റിയാദ്: ഇന്ത്യയിൽ നിന്ന് സൗദി അറേബ്യയിലേക്കുള്ള വിമാന സർവ്വീസ് പുനരാരംഭിക്കുന്നതിന്റെ ഭാഗമായി ഇന്ത്യൻ എംബസി അധികൃതർ സഊദി സിവിൽ ഏവിയേഷൻ ജനറൽ അതോറിറ്റി (ഗാക) അധികൃതരുമായി ചർച്ച നടത്തി. റിയാദ് ഇന്ത്യൻ എംബസി ഡെപ്യൂട്ടി ചീഫ് ഓഫ് മിഷൻ (ഡി.സി.എം) എൻ.റാം പ്രസാദാണ്‌ സഊദി സിവിൽ ഏവിയേഷൻ ജനറൽ അതോറിറ്റി അസിസ്റ്റന്റ് പ്രസിഡണ്ട് ഡോ.ബദർ അൽസഗ്രിയുമായി അതോറിറ്റി ആസ്ഥാനത്ത് ചർച്ച നടത്തിയത്.

കോവിഡ് വ്യാപനത്തെ തുടർന്ന് ഏർപ്പെടുത്തിയ യാത്ര നിരോധനം നീക്കുക, ഇരു ഭാഗത്തു നിന്നുമുള്ള വിമാന സർവ്വീസിന്‌ വേണ്ടി എയർ ബബിൾ കരാർ ഒപ്പിടുക, വിമാന സർവ്വീസുകൾ സാധ്യമായ രീതിയിൽ ഉടനെ പുനസ്ഥാപിക്കുക എന്നീ വിഷയങ്ങളാണ്‌ ഇവർ ചർച്ച നടത്തിയത്. ആവശ്യത്തിന്മേൽ ഗാക അധികൃതർക്ക് അനുകൂലമായ നിലപാടാണ്‌ ഉള്ളതെന്ന് എംബസിയധികൃതർ പറഞ്ഞു. ചർച്ചകൾ പുരോഗമിക്കുകയാണെന്നും ആരോഗ്യ മന്ത്രാലയത്തിന്റെ അനുമതി ലഭിച്ചാലുടൻ വിമാന സർവ്വീസ് പുനരാരംഭിക്കാനാവുമെന്നും ഇവർ വ്യക്തമാക്കി.

ഇതിനിടെ ആരോഗ്യ മന്ത്രാലയവുമായും ഇന്ത്യൻ എംബസി ചർച്ച നടത്തി വരുന്നുണ്ട്. ഇന്ത്യൻ അംബാസഡർ ഡോ.ഔസാഫ് സഈദ് ഈ വിഷയത്തിൽ ആരോഗ്യ വകുപ്പ് മന്ത്രി അബ്ദുറഹ്മാൻ അൽ ഐബാൻ, അസിസ്റ്റന്റ് ഡെപ്യൂട്ടി മന്ത്രി സാറ അൽ സഈദ് എന്നിവരുമായി ഓൺലൈനിൽ ചർച്ച നടത്തിയതായും എംബസി അധികൃതർ അറിയിച്ചു. ഇന്ത്യൻ എംബസി സെക്കന്റ് സെക്രട്ടാറി അസീം അൻ വറും കൂടിക്കാഴ്ചയിൽ പങ്കെടുത്തു. എംബസിയുടെ ഈ നീക്കത്തെ പ്രവാസി സമൂഹം പ്രതീക്ഷയോടെയാണ്‌ കാണുന്നത്.