തിരുവനന്തപുരം: മലയാളം സര്‍വകലാശാലയ്ക്കുവേണ്ടി സ്ഥലമേറ്റെടുക്കുന്നതില്‍ അഴിമതി ആരോപിച്ച് പ്രതിപക്ഷം സഭ വിട്ടിറങ്ങി. അഴിമതി ചൂണ്ടിക്കാട്ടി നല്‍കിയ നോട്ടിസ് അടിയന്തര പ്രമേയമായി അവതരിപ്പിക്കാനാകില്ലെന്ന് സ്പീക്കര്‍ പറഞ്ഞതോടെയാണ് പ്രതിപക്ഷം സഭ വിട്ടത്.

മലയാളം സര്‍വകലാശാലയുടെ പ്രതിസന്ധി സഭാനടപടികള്‍ നിര്‍ത്തിവച്ച് ചര്‍ച്ച ചെയ്യണമെന്നാവശ്യപ്പെട്ട് സി. മമ്മൂട്ടിയാണ് അടിയന്തര പ്രമേയത്തിന് അനുമതി തേടിയത്. ഇതിനിടെ പ്രതിപക്ഷ അംഗങ്ങള്‍ നടുത്തളത്തിലിറങ്ങി പ്രതിഷേധിച്ചു. പിന്നീട് ശ്രദ്ധക്ഷണിക്കല്‍ പ്രമേയം അവതരിപ്പിക്കാന്‍ സ്പീക്കര്‍ അനുമതി നല്‍കി. ഭൂമി ഏറ്റെടുക്കലുമായി ബന്ധപ്പെട്ട് കോടിക്കണക്കിന് രൂപ കമ്മിഷന്‍ വാങ്ങിയെന്ന ആരോപണം നിലനില്‍ക്കുന്ന സാഹചര്യത്തില്‍ അടിയന്തര പ്രമേയമായി വിഷയം ചര്‍ച്ച ചെയ്യണമെന്നും സ്പീക്കര്‍ തീരുമാനം പുനഃപരിശോധിക്കണമെന്നും പ്രതിപക്ഷ നേതാവ് ആവര്‍ത്തിച്ചു. എന്നിട്ടും സ്പീക്കര്‍ നിലപാട് മാറ്റാന്‍ തയാറാകാത്തതോടെ പ്രതിപക്ഷ അംഗങ്ങള്‍ സഭയില്‍നിന്ന് ഇറങ്ങിപ്പോകുകയായിരുന്നു. അതേസമയം സര്‍വകലാശാലക്കായി വാങ്ങുന്ന 5.76 ഹെക്ടര്‍ ഭൂമിയില്‍ വെറും 1.42 ഹെക്ടര്‍ ഭൂമി മാത്രമേ സര്‍വകലാശാല കെട്ടിടം പണിയുവാന്‍ സാധിക്കൂവെന്ന് രേഖകള്‍ ചൂണ്ടിക്കാട്ടി മമ്മൂട്ടി ആരോപിച്ചു.
2015ല്‍ ഈ ഭൂമി വാങ്ങിയിരിക്കുന്നത് വെറും 5,100 രൂപ മുതല്‍ 7,500 രൂപയ്ക്കാണ്. ആ സ്ഥലമാണ് ഇപ്പോള്‍ സെന്റിന് 1,60,000 രൂപക്ക് വാങ്ങുന്നതിന് കരാറുണ്ടാക്കിയിരിക്കുന്നത്. ഇതിന് ചുക്കാന്‍ പിടിച്ചത് മന്ത്രി കെ.ടി ജലീലാണെന്നും പ്രതിപക്ഷ നേതാക്കള്‍ വാര്‍ത്താസമ്മേളനത്തില്‍ ആരോപിച്ചു.