തിരുവനന്തപുരം: പൊലിസ് സഹകരണസംഘം തെരഞ്ഞെടുപ്പിലെ വിജയം ആഘോഷിക്കാനെന്ന പേരില്‍ മദ്യപിച്ച് പൂസായി പൊലിസുകാരന്‍ പൊലിസ് സ്റ്റേഷനിലെത്തി പടക്കം പൊട്ടിച്ചു. തിരുവവന്തപുരം മഗംലപുരം പൊലിസ് സ്റ്റേഷനിലെ സിവില്‍ പൊലിസ് ഓഫിസര്‍ ബിജുവാണ് സേനക്കാകെ നാണക്കേടുണ്ടാക്കുന്ന പ്രവര്‍ത്തി നടത്തിയത്. വ്യാഴാഴ്ച രാത്രി പത്തോടെയാണ് സംഭവം.

മദ്യപിച്ച് ബോധമില്ലാതെ കാറിലെത്തിയ ബിജു സ്‌റ്റേഷനില്‍ പടക്കം പൊട്ടിക്കാന്‍ ശ്രമിക്കുകയായിരുന്നു. ഈ സമയത്ത് അവിടെയുണ്ടായിരുന്ന സി.ഐ ഇയാളെ തടയാന്‍ ശ്രമിച്ചെങ്കിലും അതിന് വഴങ്ങാതെ പടക്കം പൊട്ടിച്ചു. തുടര്‍ന്ന് ബഹളമുണ്ടാക്കുകയും ചെയ്തു. ബിജുവിനോട് പുറത്ത് പോകാന്‍ ആവശ്യപ്പെരട്ടെങ്കിലും ഇയാള്‍ സമ്മതിച്ചില്ല. പിന്നീട് കാറില്‍ മടങ്ങാനൊരുങ്ങവെ സ്റ്റേഷന് പുറത്ത് വച്ച് ഇയാളുടെ കാര്‍ മറ്റൊരു കാറില്‍ ഇടിക്കുകയും ചെയ്തു. തുടര്‍ന്ന് നാട്ടുകാര്‍ ഇയാളെ തടഞ്ഞുവച്ച് പൊലിസിന് തന്നെ കൈമാറുകയായിരുന്നു.

പൊലിസ് സ്റ്റേഷനില്‍ എത്തിച്ച ഇയാള്‍ വീണ്ടും ബഹളമുണ്ടാക്കി തറയില്‍ കിടന്നുരുളുകയും തല തറയില്‍ ഇടിച്ച് സ്വയം പരുക്കേല്‍പ്പിക്കാന്‍ ശ്രമിക്കുകയും ചെയ്തു. മദ്യപിച്ച് വാഹനം ഓടിച്ചതിനും പൊതുസ്ഥലത്ത് ബഹളമുണ്ടാക്കിയതിനും സ്റ്റേഷനില്‍ അതിക്രമിച്ച് കടന്ന് പടക്കം പൊട്ടിച്ചതിനും ഇയാള്‍ക്കെതിരേ വിവിധ വകുപ്പുകള്‍ ചേര്‍ത്ത് കേസെടുത്തതായി പൊലിസ് ഉദ്യോഗസ്ഥര്‍ പറഞ്ഞു. ഇയാള്‍ക്കെതിരേ വകുപ്പുതല നടപടി ഉണ്ടാകുമെന്നും അവര്‍ പറഞ്ഞു.