കൊണ്ടോട്ടി: നഗരസഭ ചെയര്‍പേഴ്‌സണ്‍, വൈസ് ചെയര്‍പേഴ്‌സണ്‍ തെരഞ്ഞെടുപ്പ് നാളെ നടക്കും. രാവിലെ 11ന് ചെയര്‍പേഴ്‌സണ്‍ തെരഞ്ഞെടുപ്പും ഉച്ചക്ക് 1.30ന് വൈസ്‌ചെയര്‍പേഴ്‌സണ്‍ തെരഞ്ഞെടുപ്പുമാണ് നടക്കുക. യു.ഡി.എഫ് ഭരണസമിതി നിലവിലുളള കൊണ്ടോട്ടിയില്‍ നഗരസഭ ചെയര്‍മാന്‍ കോണ്‍ഗ്രസിലെ സി.കെ നാടിക്കുട്ടി, വൈസ് ചെയര്‍പേഴ്‌സണ്‍ മുസ്‌ലിംലീഗിലെ പാലക്കല്‍ ഷറീന എന്നിവര്‍ കഴിഞ്ഞ 30ന് രാജിവച്ചതോടെയാണ് പുതിയ സാരഥികളെ തെരഞ്ഞെടുക്കുന്നത്.
കോണ്‍ഗ്രസും മുസ്‌ലിംലീഗും യോജിച്ച് യു.ഡി.എഫ് പുനസ്ഥാപിച്ചതോടെയുണ്ടാക്കിയ ധാരണപ്രകാരം ചെയര്‍മാന്‍ സ്ഥാനം മുസ്‌ലിംലീഗിനും വൈസ് ചെയര്‍പേഴ്‌സണ്‍ സ്ഥാനം കോണ്‍ഗ്രസിനുമാണ്.
   നഗരസഭയിലെ 40 അംഗ വാര്‍ഡില്‍ മുസ്‌ലിംലീഗിന് 18, കോണ്‍ഗ്രസിന് ഒരു സ്വതന്ത്രന്‍ ഉള്‍പ്പടെ 11 കൗണ്‍സിലര്‍മാരുമുണ്ട്. ഇടതുമുന്നണിക്ക് പത്തും എസ്.ഡി.പി.ഐക്ക് ഒരു കൗണ്‍സിലറുമാണുളളത്. ചെയര്‍മാന്‍ സ്ഥാനം എസ്.ഇ സംവരണവും വൈസ് ചെയര്‍പേഴ്‌സണ്‍ വനിതാ സംവരണവുമാണ്. നെടിയിരുപ്പ് പഞ്ചയാത്ത് മുന്‍ പ്രസിഡന്റ് കെ.സി ഷീബയെയാണ്  ചെയര്‍പേഴ്‌സണ്‍ സ്ഥാനത്തേക്ക് ലീഗ് തീരുമാനിച്ചിരിക്കുന്നത്. നഗരസഭയിലെ 30-ാം ഡിവിഷന്‍ പാലക്കാപ്പറമ്പില്‍നിന്നാണ് ഷീബ തെരഞ്ഞെടുക്കപ്പെട്ടത്.
കോണ്‍ഗ്രസ് കെ. ആയിഷാബിയെയാണ് വൈസ് ചെയര്‍പേഴ്‌സണ്‍ സ്ഥാനത്തേക്ക് പരിഗണിക്കുന്നത്. നഗരസഭയിലെ 18-ാം വാര്‍ഡ് വാക്കത്തെടിയില്‍ നിന്നാണ് ആയിഷാബി തെരഞ്ഞെടുക്കപ്പെട്ടത്.