വാഷിങ്ടണ്‍: ജനുവരിയില്‍ അധികാരമേറ്റാല്‍ കൊവിഡിനെതിരേ മാസ്‌ക് നിര്‍ബന്ധമാക്കുന്നത് ഉള്‍പ്പെടെയുള്ള നടപടികളുമായി മുന്നോട്ടുപോകുമെങ്കിലും രാജ്യം പൂര്‍ണമായി അടച്ചിടില്ലെന്ന് നിയുക്ത പ്രസിഡന്റ് ജോ ബൈഡണ്‍.
കൊവിഡിനെ പ്രതിരോധിക്കാന്‍ മാസ്‌ക് ധരിക്കലും സാമൂഹിക അകലം പാലിക്കലും അത്യന്താപേക്ഷിതമാണ്. എന്നാല്‍ അത് രാജ്യം അടച്ചിട്ടാവില്ല. സ്ഥിതി സങ്കീര്‍ണമായ പ്രത്യേക മേഖലകള്‍ അടച്ചിടുന്നത് പരിഗണിക്കുമെന്നും അദ്ദേഹം വ്യക്തമാക്കി. ഗവര്‍ണര്‍മാരില്‍ ഭൂരിഭാഗവും രാജ്യത്ത് മാസ്‌ക് നിര്‍ബന്ധമാക്കണമെന്ന പക്ഷക്കാരാണ്. രാജ്യം നാളിതുവരെ കാണാത്ത പ്രതിസന്ധിയെയാണ് മഹാമാരിയിലൂടെ അനുഭവിച്ചുകൊണ്ടിരിക്കുന്നതെന്നും യു.എസ് സ്‌റ്റേറ്റ് ഗവര്‍ണര്‍മാരില്‍ പ്രമുഖരുമായി നടത്തിയ സംഭാഷണത്തില്‍ അദ്ദേഹം ഓര്‍മിപ്പിച്ചു. ഇതുവരെ രാജ്യത്ത് രണ്ടരലക്ഷം മനുഷ്യരാണ് കൊവിഡ് ബാധിച്ച് മരിച്ചിരിക്കുന്നത്. ഇതിനെ ഒരു രാഷ്ട്രീയ പ്രസ്താവനയായി കാണാനാവില്ല.
മാസ്‌ക് ധരിക്കുകയെന്നത് രാജ്യസ്‌നേഹത്തിന്റെ ഭാഗമായി കാണേണ്ടതാണ്. 1.16 കോടി യു.എസ് പൗരന്മാരെയാണ് കൊവിഡ് 19 ബാധിച്ചിരിക്കുന്നതെന്നും ബൈഡണ്‍ പറഞ്ഞു.
ദിനേന 1.62 ലക്ഷം പേര്‍ക്കാണ് രോഗം ബാധിക്കുന്നത്. വൈറസ് വ്യാപനം വര്‍ധിക്കുന്ന സാഹചര്യത്തില്‍ അമേരിക്കയിലെ പല സംസ്ഥാനങ്ങളും കൂടുതല്‍ ശക്തമായ നടപടികളുമായി മുന്നോട്ടുപോകുകയാണ്.