ന്യൂഡല്‍ഹി: സ്വാശ്രയ മെഡിക്കല്‍ പ്രവേശനത്തിന് രണ്ടിരട്ടിയലധികം ഫീസ് ഇടാക്കാന്‍ വഴിയൊരുക്കുന്ന ഹൈക്കോടതി ഇടക്കാല ഉത്തരവിനെതിരേ സംസ്ഥാന സര്‍ക്കാര്‍ സുപ്രിംകോടതിയെ സമീപിച്ചു.
നവംബര്‍ 13ന് ഹൈക്കോടതി ഡിവിഷന്‍ ബെഞ്ച് പുറപ്പെടുവിച്ച വിധിക്കെതിരെയാണ് സംസ്ഥാന സര്‍ക്കാര്‍ സുപ്രിംകോടതിയിലെത്തിയിരിക്കുന്നത്. കേന്ദ്ര മെഡിക്കല്‍ കമ്മിഷന്‍ നിലവില്‍ വരാത്തതിനാല്‍ സുപ്രിംകോടതി ഉത്തരവു പ്രകാരം നിലവില്‍ വന്ന ഫീസ് നിര്‍ണയ സമിതി നിശ്ചയിക്കുന്ന ഫീസാണ് വിദ്യാര്‍ഥികളില്‍ നിന്ന് ഈടാക്കേണ്ടതെന്നാണ് സംസ്ഥാന സര്‍ക്കാര്‍ ഹരജിയില്‍ വാദിച്ചിരിക്കുന്നത്. അതിനു വിരുദ്ധമായ ഹൈക്കോടതിയുടെ ഇടക്കാല വിധി സ്റ്റേ ചെയ്യണമെന്നും സര്‍ക്കാര്‍ ഹരജിയില്‍ ആവശ്യപ്പെട്ടിട്ടുണ്ട്.
2019 ലെ കേന്ദ്ര മെഡിക്കല്‍ കമ്മിഷന്‍ നിയമം നിലവില്‍ വന്നതോടെ ഫീസ് നിര്‍ണയിക്കാനുള്ള അധികാരം മെഡിക്കല്‍ കമ്മിഷനാണെന്നാണ് ഹൈക്കോടതി ഇടക്കാല ഉത്തരവ് പുറപ്പെടുവിച്ചത്. അതിനാല്‍ ഫീസ് നിര്‍ണയ സമിതി നിശ്ചയിച്ച ഫീസ് പുനര്‍നിര്‍ണയിക്കണമെന്നും കോളജുകള്‍ ആവശ്യപ്പെടുന്ന പരമാവധി ഫീസുവരെ നല്‍കേണ്ടി വരുമെന്ന് വിദ്യാര്‍ഥികളെ അറിയിക്കാനും ഹൈക്കോടതി നിര്‍ദ്ദേശിച്ചിരുന്നു.
ഇതോടെ ചില സ്വാശ്രയ മെഡിക്കല്‍ കോളജുകള്‍ പുതിയ ഫീസ് ഘടന ആവശ്യപ്പെട്ട് കത്തു നല്‍കി. സ്വാശ്രയ മെഡിക്കല്‍ കോളജുകളില്‍ 85 ശതമാനം മെറിറ്റ് സീറ്റില്‍ ജസ്റ്റിസ് രാജേന്ദ്ര ബാബു ഫീസ് നിര്‍ണയ സമിതി നേരത്തെ നിശ്ചയിച്ചത് 6.32 ലക്ഷം മുതല്‍ 7.65 ലക്ഷം വരെയായിരുന്നു. മാനേജ്‌മെന്റുകള്‍ ഇപ്പോള്‍ ആവശ്യപ്പെടുന്നത് 11 മുതല്‍ 22 ലക്ഷം വരെയാണ്. ഇക്കാര്യമാണ് സംസ്ഥാന സര്‍ക്കാര്‍ സുപ്രിംകോടതിയില്‍ ചൂണ്ടിക്കാട്ടിയിരിക്കുന്നത്.
സര്‍ക്കാരിന്റെ ഹരജിയില്‍ ഉത്തരവ് പുറപ്പെടുവിക്കും മുന്‍പ് തങ്ങളുടെ വാദം കേള്‍ക്കണമെന്നാവശ്യപ്പെട്ട് മാനേജ്‌മെന്റുകള്‍ സുപ്രിംകോടതിയില്‍ തടസഹരജി ഫയല്‍ ചെയ്തു.
കെ.എം.സി.ടി മെഡിക്കല്‍ കോളജിന് വേണ്ടി അഭിഭാഷകനായ ഹാരിസ് ബീരാനും, കരുണ മെഡിക്കല്‍ കോളജിനു വേണ്ടി സുല്‍ഫിക്കര്‍ അലിയുമാണ് തടസഹരജി ഫയല്‍ ചെയ്തത്.