ന്യൂഡല്‍ഹി: മുസ്്‌ലിംകള്‍ക്കും ദലിത്-പിന്നാക്ക ജനവിഭാഗങ്ങള്‍ക്കും നേരെ നടക്കുന്ന ആള്‍ക്കൂട്ട ആക്രമണങ്ങള്‍ക്കു പിന്നില്‍ സംഘ്പരിവാര്‍ സംഘടനകളാണെന്ന് ഹൈദരാബാദ് എം.പിയും എ.ഐ.എം.ഐ.എം അധ്യക്ഷനുമായ അസദുദ്ദീന്‍ ഉവൈസി.
രാജ്യത്ത് അടുത്തകാലത്തുണ്ടായ എല്ലാ ആള്‍ക്കൂട്ട ആക്രമണങ്ങള്‍ക്കും പിന്നില്‍ സംഘ്പരിവാര്‍ സംഘടനകളാണെന്ന കാര്യത്തില്‍ സംശയമില്ല. ജയ് ശ്രീറാം വിളിക്കാന്‍ നിര്‍ബന്ധിച്ച് മുസ്്‌ലിംകളെ ആക്രമിക്കുകയാണ് സംഘ്പരിവാര്‍ പ്രവര്‍ത്തകരെന്നും അദ്ദേഹം ആരോപിച്ചു.
ജയ് ശ്രീറാം, വന്ദേമാതരം എന്നിങ്ങനെ വിളിക്കാന്‍ വിസമ്മതിക്കുന്നവര്‍ വ്യാപകമായി ആക്രമിക്കപ്പെടുകയാണ്. രാജ്യത്തെ മുസ്്‌ലിംകളെയും ദലിതരെയും ലക്ഷ്യം വച്ചാണ് ഇത്തരം ആക്രമണങ്ങള്‍ പ്രധാനമായും ഉണ്ടാകുന്നത്. ഏതൊരു ആക്രമണത്തിനു പിന്നിലും സംഘ്പരിവാറുമായി ബന്ധമുള്ള സംഘടനകളാണെന്നും അസദുദ്ദീന്‍ ഉവൈസി ആരോപിച്ചു.
മോഷ്ടാവെന്ന് ആരോപിച്ച് ജാര്‍ഖണ്ഡില്‍ തബ്രേസ് അന്‍സാരിയെന്ന യുവാവിനെ പിടികൂടി ജയ് ശ്രീറാം, ജയ് ഹനുമാന്‍ എന്ന് വിളിപ്പിച്ച് മര്‍ദിച്ച് കൊലപ്പെടുത്തുകയായിരുന്നു. ഇതിന് പിന്നാലെ നിരവധി ആക്രണങ്ങളാണ് രാജ്യത്തിന്റെ പലഭാഗത്തുനിന്നും റിപ്പോര്‍ട്ട് ചെയ്യപ്പെട്ടിട്ടുള്ളത്.
നേരത്തെ പശു മോഷണം ആരോപിച്ചായിരുന്നു മുസ്്‌ലിംകളും ദലിതരും ഇരകളാക്കപ്പെട്ടിരുന്നത്. പിന്നീട് ബീഫിന്റെ പേരിലായി. എല്ലാവര്‍ക്കും വികസനമെന്ന മോദിയുടെ വീക്ഷണത്തിന് യോജിച്ചതാണോ ഇത്തരം ആക്രമണങ്ങളെന്നും അദ്ദേഹം ചോദിച്ചു.
സമൂഹത്തില്‍ മുസ്്‌ലിംകള്‍ക്കെതിരായ ആക്രമണങ്ങള്‍ അവസാനിപ്പിക്കാന്‍ ഇതുവരെ ആര്‍.എസ്.എസും ബി.ജെ.പിയും തയാറായിട്ടില്ല. ജനങ്ങള്‍ക്കിടയില്‍ വെറുപ്പ് വളര്‍ത്താനാണ് ഇവര്‍ ശ്രമിക്കുന്നത്. മുസ്്‌ലിംകള്‍ക്കെതിരേ ഭീകരവാദികള്‍, ദേശവിരുദ്ധര്‍, പശുക്കളെ കൊലപ്പെടുത്തുന്നവര്‍ എന്നിങ്ങനെ ചൂണ്ടിക്കാട്ടി ആക്രമണങ്ങള്‍ അഴിച്ചു വിടുന്നത് തുടരുകയാണെന്നും ഉവൈസി ആരോപിച്ചു,. ഇപ്പോള്‍ ജയ് ശ്രീറാം എന്ന് വിളിക്കാത്തവര്‍ക്കുനേരെ ആക്രമണം അഴിച്ചുവിടുകയാണ് സംഘ്പരിവാര്‍ സംഘടനകളെന്നും അദ്ദേഹം കൂട്ടിച്ചേര്‍ത്തു.