തിരുവനന്തപുരം: പൊതുയോഗത്തില്‍ അധ്യിപകമാര്‍ക്കെതിരേ അസഭ്യവര്‍ഷം നടത്തിയ ബി.ജെ.പി ജില്ലാ പ്രസിഡന്റ് അഡ്വ.സുരേഷിനെതിരേ പാറശാല പൊലിസ് കേ സെടുത്തു. കോളജിലെ അധ്യാപികമാരെ അവഹേളിച്ച് പ്രസംഗിച്ചു എന്നാണ് ആരോപണം.
അധ്യാപികമാര്‍ക്കുണ്ടായ മനോവിഷമം കണക്കിലെടുത്ത് കോളജ് അധികൃതര്‍ നല്‍കിയ പരാതിയുടെ അടിസ്ഥാനത്തിലാണ് കേസ് രജിസ്റ്റര്‍ ചെയ്തത്. സംഘര്‍ഷത്തില്‍ പ്രതികളായ എ.ബി.വി.പി പ്രവര്‍ത്തകരെ സസ്‌പെന്‍ഡ് ചെയ്ത ധനുവച്ചപുരം വി.ടി.എം എന്‍.എസ്.എസ് കോളജിന്റെ നടപടിയില്‍ പ്രതിഷേധിച്ച് സംഘടിപ്പിച്ച യോഗത്തിലായിരുന്നു ജില്ലാ പ്രസിഡന്റ് എസ്. സുരേഷിന്റെ അസഭ്യവര്‍ഷം.
ഈ കഴിഞ്ഞ ചൊവ്വാഴ്ച്ച പാറശാലയില്‍ നടന്ന പരിപാടിയുടെ ദൃശ്യങ്ങള്‍ ഇന്നലെയാണ് പുറത്ത് വന്നത്. കഴിഞ്ഞ തിങ്കളാഴ്ച്ച കോളജിനു പുറത്തുണ്ടായ സംഘര്‍ഷത്തെ തുടര്‍ന്ന് രണ്ടാം വര്‍ഷ വിദ്യാര്‍ഥികളും എ.ബി.വി.പി പ്രവര്‍ത്തകരുമായ ആറുപേര്‍ക്കെതിരേ പൊലിസ് കേസെടുത്തിരുന്നു.
തുടര്‍ന്നാണ് വിദ്യാര്‍ഥികളെ കോളജില്‍ നിന്ന് സസ്‌പെന്‍ഡ് ചെയ്തത്. കോളജ് പ്രിന്‍സിപ്പാളും അധ്യാപികമാരും സി.പി.എമ്മിനു വേണ്ടി പ്രവര്‍ത്തിക്കുകയാണെന്ന് ആരോപിച്ച എസ്. രമേശ് തുടര്‍ന്ന് തീര്‍ത്തും മോശമായ പദപ്രയോഗങ്ങള്‍ നടത്തുകയായിരുന്നു.
കോളജില്‍ നടക്കുന്ന നാകിന്റെ അക്രഡിറ്റേഷനുമായ ബന്ധപ്പെട്ട പ്രവര്‍ത്തനങ്ങളെ തകിടംമറിക്കുന്നതിന് കരുതിക്കൂട്ടിയാണ് ഒരു വിഭാഗം വിദ്യാര്‍ഥികള്‍ സംഘര്‍ഷമുണ്ടാക്കിയതെന്നാണ് കോളജ് അധികൃതര്‍ പറയുന്നത്. തുടര്‍ന്നാണ് ഇവര്‍ക്കെതിരേ നടപടിയെടുത്തത്.