പേരാമ്പ്ര: മിന്നലില്‍ പേരാമ്പ്ര മേഖലയില്‍ പരക്കെ നാശനഷ്ടം. പന്തിരിക്കരയില്‍ തൊഴുത്തില്‍ കെട്ടിയ ഗര്‍ഭിണിയായ പശു മിന്നലേറ്റ് ചത്തു. നൊച്ചാട് ചാത്തോത്ത് താഴയില്‍ അരിയോട്ടില്‍ മീത്തല്‍ അബൂബക്കറിന്റെ വീടിന്റെ കോണ്‍ക്രീറ്റ് സ്ലാബ് അടര്‍ന്നു. വയറിങ് മുഴുവന്‍ കത്തിനശിച്ചതോടെ വീട്ടിലെ ഇലക്ടോണിക്‌സ് ഉപകരണങ്ങളും  പൊട്ടിത്തെറിച്ചു. ഒരു ലക്ഷം രൂപയോളം നഷ്ടമുണ്ടെന്ന് കണക്കാക്കുന്നു. പന്തിരിക്കര മലപ്പാടികണ്ടി നാരായണന്റെ തൊഴുത്തിലെ ഗര്‍ഭിണിയായ പശുവാണ് ചത്തത്. ഇന്നലെ വൈകിട്ടാണ് സംഭവം. കനത്ത മഴയും കാറ്റും കാരണം മിക്ക സ്ഥലത്തും കൃഷിനാശവും സംഭവിച്ചു. വൈദ്യുതി ബന്ധം തകരാറിലായത് പ്രദേശങ്ങളെ ഇരുട്ടിലാക്കി.