കൊല്ലം: പത്തനാപുരം തലവൂര്‍ ഓര്‍ത്തഡോക്‌സ് വലിയ പള്ളി സെമിത്തേരിയിലെ കല്ലറ തകര്‍ത്ത് കടത്തിയ വൃദ്ധയുടെ മൃതദേഹം ചാക്കില്‍ കെട്ടിയ നിലയില്‍ കണ്ടെത്തി. നടത്തേരി മുഗള്‍വിള കഞ്ഞേലി കുഞ്ഞപ്പി(88)യുടെ മൃതദേഹമാണ് കാണാതായായിരുന്നത്.
കഴിഞ്ഞ മാര്‍ച്ച് 27നായിരുന്നു ഇവരുടെ മൃതദേഹം മറവു ചെയ്തത്. ഇന്നലെ പള്ളിയില്‍ പ്രാര്‍ഥനയ്‌ക്കെത്തിയവരാണ് കല്ലറ തകര്‍ന്ന് ശവപ്പെട്ടി പുറത്ത് കിടക്കിടക്കുന്നത് കണ്ടത്. തുടര്‍ന്ന് നടത്തിയ പരിശോധനയില്‍ മൃതദേഹം കാണാനില്ലെന്ന വിവരം ലഭിക്കുകയും പൊലിസില്‍ അറിയിക്കുകയുകയുമായിരുന്നു.
കുന്നിക്കോട് പൊലിസ് സ്ഥലത്തെത്തി നടത്തിയ അന്വേഷണത്തില്‍ മരിച്ച കുഞ്ഞേലിയുടെ കുടുംബ വീടിനോട് ചേര്‍ന്നുള്ള റബ്ബര്‍ തോട്ടത്തിന്‍ നിന്ന് മൃതദേഹം ചാക്കില്‍ കെട്ടിയ നിലയില്‍ കണ്ടെത്തി. സംഭവുമായി ബന്ധപ്പെട്ട് കുഞ്ഞേലിയുടെ മകന്‍ തങ്കച്ചനെ (55) പൊലിസ് അറസ്റ്റു ചെയ്തു. മാനോവൈകല്യമുള്ള ആളാണ് ഇയാള്‍. കഴിഞ്ഞ ബുധനാഴ്ചയ്ക്ക് ശേഷമാകാം കല്ലറ തകര്‍ത്തതെന്നാണ് പൊലിസ് പറയുന്നത്. ബുധനാഴ്ച വരെ മറ്റ് കല്ലറകളില്‍ മെഴുകുതിരി കത്തിക്കാന്‍ വിശ്വാസികള്‍ എത്തിയിരുന്നു. തെളിവെടുപ്പിന് ശേഷം വീട്ടുകാര്‍ക്ക് വിട്ട് നല്‍കിയ ശരീരാവശിഷ്ടങ്ങള്‍ പള്ളിസെമിത്തേരിയില്‍ വീണ്ടും മറവു ചെയ്തു.
അടക്കം ചെയ്ത മൃതദേഹത്തോട് അനാദരവ് കാട്ടിയെന്ന പള്ളി കമ്മിറ്റിയുടെ പരാതിയുടെ അടിസ്ഥാനത്തിലാണ് തങ്കച്ചനെ അറസ്റ്റു ചെയ്തത്. ഇയാളെ പിന്നീട് ജാമ്യത്തില്‍ വിട്ടയച്ചു.