തലശ്ശേരി: കുട്ടികള്‍ക്കായി കേരള ചലച്ചിത്ര അക്കാദമിയുടെയും തലം ഫിലിം സൊസൈറ്റിയുടെയും നേതൃത്വത്തില്‍ സംഘടിപ്പിക്കുന്ന ചലച്ചിത്രാസ്വാദന ക്യാംപ് തിരുവങ്ങാട് സ്‌പോര്‍ട്ടിങ് യൂത്ത്‌സ് ലൈബ്രറിയില്‍ തുടങ്ങി.
മൂന്നു ദിവസത്തെ ക്യാംപ് സാഹിത്യകാരന്‍ എന്‍. പ്രഭാകരന്‍ ഉദ്ഘാടനം ചെയ്തു. കുട്ടികളുടെ സിനിമ അവര്‍ തന്നെ നിര്‍മിക്കണമെന്ന് പ്രഭാകരന്‍ പറഞ്ഞു. ഭാവനാ
ലോകത്ത് കുട്ടികള്‍ സ്വാതന്ത്ര്യത്തോടെ പ്രവര്‍ത്തിക്കണം. മുതിര്‍ന്നവര്‍ ആവിഷ്‌കരിച്ചാല്‍ അത് കുട്ടികള്‍ ചുറ്റുപാടുകളെ നോക്കിക്കാണുന്നതു പോലെയാകില്ല. സാങ്കേതിക മേഖലയില്‍ കുട്ടികള്‍ക്ക് മുതിര്‍ന്നവരുടെ സഹായം തേടാമെന്നും പ്രഭാകരന്‍ പറഞ്ഞു. ഹാറൂണ്‍ റഷീദ് അധ്യക്ഷനായി.
പ്രദീപ് ചൊക്ലി, അസീസ് തെരുവണ സംസാരിച്ചു. സംവിധായകന്‍ സുവീരന്‍ ക്ലാസ്സെടുത്തു. തിങ്കളാഴ്ച എന്‍. ശശിധരന്‍, വി.കെ ജോസഫ് സംസാരിക്കും. കുട്ടികളുടെ അഭിനയ പരിശീലകന്‍ കെ.വി വിജേഷ് പങ്കെടുക്കും. ചൊവ്വാഴ്ച വൈകിട്ട് അഞ്ചിന് ക്യാംപ് സമാപിക്കും.