വടകര: നവീകരണ പ്രവൃത്തി ഉടന്‍ പൂര്‍ത്തിയാക്കി ഒഞ്ചിയം റോഡ് ഗതാഗതയോഗ്യമാക്കണമെന്നാവശ്യപ്പെട്ട് റവല്യൂഷണറി യൂത്ത് പ്രവര്‍ത്തകരും നാട്ടുകാരും സമര രംഗത്ത്.
റോഡ് നവീകരണ പ്രവൃത്തി വിലയിരുത്താനെത്തിയ പി.ഡബ്ല്യു.ഡി സംഘത്തെയും കോണ്‍ട്രാക്ടറെയും മണിക്കൂറുകളോളം തടഞ്ഞുവച്ചു. ഒഞ്ചിയം റോഡ് വീതി കൂട്ടി നവീകരിക്കുന്ന പ്രവൃത്തി ആരംഭിച്ചിട്ട് ഒരു വര്‍ഷമായിട്ടും കാല്‍നടയാത്രക്ക് പോലും പറ്റാത്ത അവസ്ഥയാണ്. റോഡിനിരുവശത്തെയും വീട്ടുകാര്‍ക്ക് പൊടിശല്യം കാരണം പുറത്തിറങ്ങാനാവുന്നില്ല. കരാറുകാരനും ഉദ്യോഗസ്ഥരും കാണിക്കുന്ന അനാസ്ഥ ചൂണ്ടിക്കാട്ടി റോഡ് നിര്‍മാണ കമ്മിറ്റിയുടെ നേതൃത്വത്തില്‍ നിരവധി പ്രക്ഷോഭങ്ങള്‍ സംഘടിപ്പിച്ചെങ്കിലും അനക്കമില്ല. ഇതില്‍ പ്രതിഷേധിച്ചാണ് ഉദ്യോഗസ്ഥരെയും കരാറുകാരനേയും റവല്യൂഷണറി യൂത്തിന്റെ നേതൃത്വത്തില്‍ ഉപരോധിച്ചത്.