ലണ്ടന്‍: തിരുവനന്തപുരം പേട്ട സ്വദേശിയായ യുവതി ശ്രീഹരി എന്ന ഗംഗേശാനന്ദ സ്വാമിയുടെ ജനനേന്ദ്രിയം മുറിച്ച വാര്‍ത്ത അന്താരാഷ്ട്ര മാധ്യമങ്ങളിലും. ബ്രിട്ടനിലെ ഇന്റിപെന്റന്റ്, ബി.ബി.സി, ടെലഗ്രാഫ്, ദി സണ്‍, ഡെയ്‌ലി മെയില്‍, പാകിസ്താനിലെ ദി എക്‌സ്പ്രസ് ട്രിബ്യൂണ്‍, അല്‍ ജസീറ, ഇസ്‌റാഈലിലെ ഹ്യൂ വയര്‍ തുടങ്ങിയ മാധ്യമങ്ങളാണ് വാര്‍ത്ത പ്രാധാന്യത്തോടെ നല്‍കിയത്.
ബ്രിട്ടീഷ് മാധ്യമങ്ങളിലെ വാര്‍ത്തയില്‍ യുവതിക്ക് മുഖ്യമന്ത്രി പിണറായി വിജയന്‍ നല്‍കിയ പിന്തുണ എടുത്തുപറയുന്നുണ്ട്. ഹിന്ദുസ്ഥാന്‍ ടൈംസ്, എന്‍.ഡി.ടി.വി എന്നീ ദേശീയ മാധ്യമങ്ങളെ ഉദ്ധരിച്ചാണ് ബ്രിട്ടീഷ് മാധ്യമങ്ങള്‍ വാര്‍ത്ത നല്‍കിയത്. മുഖ്യമന്ത്രി, പൊലിസ് ,സ്വാമി എന്നിവരുടെ പ്രതികരണങ്ങള്‍ ചേര്‍ത്തിട്ടുണ്ട്.
പാക് ദിനപത്രമായ ദി എക്‌സ്പ്രസ് ട്രിബ്യൂണ്‍ ജില്ലാ പൊലിസ് മേധാവി ജി. സ്പര്‍ജന്‍ കുമാറിനെ ഉദ്ധരിച്ചാണ് വാര്‍ത്ത റിപ്പോര്‍ട്ട് ചെയ്തത്. 2014 ല്‍ 12 കാരിയെ പീഡിപ്പിച്ചതിന് പുരോഹിതന് കേരള ഹൈക്കോടതി 40 വര്‍ഷം തടവ് വിധിച്ചിരുന്നുവെന്നും പാക് പത്രത്തിന്റെ വാര്‍ത്തയില്‍ പറയുന്നു. അന്താരാഷ്ട്ര വാര്‍ത്താ ഏജന്‍സി എ.എഫ്.പിയാണ് വാര്‍ത്ത റിപ്പോര്‍ട്ട് ചെയ്തത്.