കണ്ണൂര്‍: നഗരത്തില്‍ ഇന്നലെ കോര്‍പറേഷന്‍ ആരോഗ്യവിഭാഗം നടത്തിയ മിന്നല്‍ പരിശോധനയില്‍ പഴകിയ ഭക്ഷണവും വൃത്തിഹീനമായ രീതിയില്‍ ഭക്ഷണം പാകം ചെയ്തതുമായ ഹോട്ടലുകളും കൂള്‍ബാറുകളും കണ്ടെത്തി. സംഭവത്തില്‍ അഞ്ച് സ്ഥാപനങ്ങള്‍ക്ക് നോട്ടിസ് നല്‍കി. ഫോര്‍ട്ട് റോഡിലുള്ള ബെസ്റ്റ് കൂള്‍ ബാറില്‍ നിന്ന് മൂന്ന് മാസം പഴക്കമുള്ള പാല്‍ കണ്ടെടുത്തു.
അക്വാറിസ് ഹോട്ടലില്‍ നിന്ന് പഴകിയ പൊറോട്ടയും കറികളും പിടിച്ചെടുത്തു. ഇവ വരും ദിവസങ്ങളില്‍ മറ്റുകറികളില്‍ ചേര്‍ത്ത് കൊടുക്കാന്‍ സൂക്ഷിച്ചതായിരുന്നുവെന്ന് ഉദ്യോഗസ്ഥര്‍ പറഞ്ഞു. എസ്.എന്‍ പാര്‍ക്കിലെ ഗൗരിശങ്കര്‍ ഹോട്ടലില്‍ നിന്ന് വൃത്തിഹീനമായ സാഹചര്യത്തില്‍ പാകം ചെയ്ത പച്ചക്കറികളും നിരോധിച്ച പ്ലാസ്റ്റിക് കവറുകളും ഹോട്ടല്‍ ബീച്ചില്‍ നിന്ന് പഴകിയ ബീഫ് ഫ്രൈയും ചപ്പാത്തിയും പിടികൂടി.
ബല്ലാര്‍ഡ് റോഡിലുള്ള സോന റസ്‌റ്റോറന്റില്‍ നിന്ന് രണ്ട് കിലോ നിരോധിത പ്ലാസ്റ്റിക് കവറും പിടിച്ചെടുത്തിട്ടുണ്ട്. കോര്‍പറേഷന്‍ എ. ഡിവിഷനില്‍ രാവിലെ ഏഴിന് തുടര്‍ന്ന പരിശോധന പത്തുവരെ നീണ്ടു. വരും ദിവസങ്ങളില്‍ മറ്റു ഡിവിഷനിലും പരിശോധന തുടരും. നടപടിയെടുത്ത സ്ഥാപന ഉടമകളില്‍ നിന്ന് പിഴ ഈടാക്കും. ഹെല്‍ത്ത് ഇന്‍സ്‌പെക്ടര്‍ എം. അബ്ദുല്‍ സത്താര്‍, ജൂനിയര്‍ ഹെല്‍ത്ത് ഇന്‍സ്‌പെക്ടര്‍ന്മാരായ ബോബീഷ്, സി. ഹംസ, സജിത പരിശോധനയ്ക്ക് നേതൃത്വം നല്‍കി.