കൂത്തുപറമ്പ്: അസാധാരണമായ വിധം കതിരൂര്‍ പഞ്ചായത്തിലെ ചാടാലപ്പുഴ വറ്റാന്‍ തുടങ്ങിയതോടെ അഞ്ഞൂറിലേറെ ഗുണഭോക്താക്കള്‍ക്ക് വെള്ളം എത്തിച്ചുകൊണ്ടിരുന്ന പുഴയോരത്തെ പമ്പിങ് സംവിധാനം തടസപ്പെട്ടു. പുഴയോരത്തെ കിണറിലേക്കുള്ള നീരൊഴുക്ക് കുറഞ്ഞതാണ് പമ്പിങ് തടസപ്പെടാന്‍ കാരണം. രണ്ടു വര്‍ഷം മുന്‍പാണ് ഗ്രാമീണ ശുദ്ധജലവിതരണ ശുചിത്വ പദ്ധതിയായ ജലനിധി പ്രകാരം കതിരൂര്‍ പഞ്ചായത്തിലെ ചുണ്ടങ്ങാപൊയില്‍ പ്രദേശത്തെ ചാടാല പുഴയോരത്ത് കിണറും പമ്പ് ഹൗസും സ്ഥാപിച്ചത്.
പത്ത് വാര്‍ഡുകളിലെ 542 കുടുംബങ്ങളായിരുന്നു ഗുണഭോക്താക്കള്‍. എന്നാല്‍ പതിവിനു വിപരീതമായി അസാധാരണമായ രീതിയില്‍ ഇത്തവണ പുഴയില്‍ വെള്ളം ഇറങ്ങിയതോടെയാണ് കിണറിലേക്കുള്ള നീരൊഴുക്ക് കുറഞ്ഞത്. എന്നിട്ടും ഒന്നിടവിട്ട ദിവസങ്ങളിലായി വെള്ളം വിതരണം ചെയ്യാന്‍ കഴിഞ്ഞിരുന്നുവെങ്കിലും തിങ്കളാഴ്ച രാത്രിയോടെ പമ്പിങ് പൂര്‍ണമായും നിലച്ചു. കുടിവെള്ള ആവശ്യത്തിന് ഉള്‍പ്പെടെയുള്ള ശുദ്ധജല വിതരണമായിരുന്നു ജലനിധി പദ്ധതിയിലൂടെ അധികൃതര്‍ ലക്ഷ്യമിട്ടിരുന്നതെങ്കിലും കുടിവെള്ള ആവശ്യത്തിന് പമ്പിങ് നടത്തി വിതരണം ചെയ്യുന്ന വെള്ളം ഗുണഭോക്താക്കള്‍ക്ക് ഉപയോഗിക്കാന്‍ കഴിഞ്ഞിരുന്നില്ല.
ഫില്‍ട്ടറിങ് സംവിധാനം സ്ഥാപിക്കാത്തതിനാല്‍ ശുദ്ധജലം ലഭ്യമാകാതിരുന്നതായിരുന്നു കാരണം. ഇപ്പോള്‍ ഫില്‍ട്ടര്‍ സംവിധാനം ഏര്‍പ്പെടുത്താനുള്ള നടപടികള്‍ ആരംഭിച്ചിട്ടുണ്ട്. രണ്ടു വര്‍ഷം മുന്‍പേ പ്രവര്‍ത്തനം ആരംഭിച്ചെങ്കിലും പദ്ധതി ഇതുവരെയായി കമ്മിഷന്‍ ചെയ്തതുമില്ല. എന്നാല്‍ ഫില്‍ട്ടര്‍ ചെയ്യാതെ വിതരണം ചെയ്തുവന്ന വെള്ളത്തിന് അധികൃതര്‍ കൃത്യമായി ചാര്‍ജും ഈടാക്കിയിരുന്നു. ഇത് ചില ഗുണഭോക്താക്കളുടെ പ്രതിഷേധത്തിനും ഇടയാക്കിയിട്ടുണ്ട്. സാധാരണ ഡിസംബര്‍ മാസത്തോടെ പുഴയിലെ ജലനിരപ്പ് കുറയുന്ന സമയങ്ങളില്‍ പമ്പിങ് തടസപ്പെടാതിരിക്കാന്‍ പുഴയില്‍ തടയണ നിര്‍മിക്കാറാണ് പതിവ്. ഈ രീതി സ്വീകരിച്ച് തടസപ്പെട്ട പമ്പിങ് പുനരാരംഭിക്കാന്‍ നടപടികള്‍ സ്വീകരിക്കുമെന്ന് വാര്‍ഡംഗം നന്ദനന്‍ പറഞ്ഞു. പഞ്ചായത്തില്‍ പ്രത്യേകമായി രൂപീകരിച്ച കമ്മിറ്റിയാണ് ജലനിധി പദ്ധതിയുടെ പ്രവര്‍ത്തനങ്ങള്‍ കൈകാര്യം ചെയ്യുന്നത്.