വെട്ടത്തൂര്‍: റോഡരികില്‍ നിര്‍ത്തിയിട്ട ഓമ്‌നിവാന്‍ പൂര്‍ണമായി കത്തിനശിച്ചു. മണ്ണാര്‍മല മാനത്തുമംഗലം ബൈപാസില്‍ മണ്ണാര്‍മല പള്ളിപ്പടിയില്‍ തോട്ടുപാലത്തിന് സമീപം ഇന്നലെ ഉച്ചക്ക് ഒന്നോടെയാണ് സംഭവം. മേലാറ്റൂര്‍ റോഡില്‍നിന്ന് വരികയായിരുന്ന വാനിന്റെ സിലിണ്ടറിലെ ഗ്യാസ് തീര്‍ന്നതിനെ തുടര്‍ന്ന് പെട്രോളിലേക്ക് മാറ്റുന്നതിനിടെ തീപിടിക്കുകയായിരുന്നു.
ഷോര്‍ട്ട് സര്‍ക്യൂട്ട് മൂലം തീപ്പൊരിയുണ്ടായതാണ് അപകടകാരണമെന്ന് കരുതുന്നു. മിഠായി ഉള്‍പ്പെടെയുള്ള സാധനങ്ങള്‍ വിതരണം ചെയ്യുന്ന വാഹനമാണ് അഗ്‌നിക്കിരയായത്.
വാഹനത്തിനകത്തെ മുഴുവന്‍ സാധനസാമഗ്രികളും കത്തിനശിച്ചു. രണ്ടുപേര്‍ വാനഹത്തിലുണ്ടായിരുന്നെങ്കിലും ഓടിമാറിയതിനാല്‍ പരുക്കേല്‍ക്കാതെ രക്ഷപ്പെട്ടു. പെരിന്തല്‍മണ്ണയില്‍ നിന്ന് അഗ്നിശമനസേനാ വിഭാഗം എത്തിയാണ് തീയണച്ചത്.