കൊല്‍ക്കത്ത: പശ്ചിമബംഗാൡ ബി.ജെ.പിയുമായുള്ള സഖ്യം ഉപേക്ഷിച്ച് ഗൂര്‍ഖ ജന്‍മുക്തി മോര്‍ച്ച (ബിമല്‍ ഗുരങ് വിഭാഗം). തങ്ങളെ വഞ്ചിച്ച ബി.ജെ.പിയെ തോല്‍പ്പിക്കുമെന്നും വരുന്ന തെരഞ്ഞെടുപ്പില്‍ മമതാ ബാനര്‍ജിയുടെ തൃണമൂല്‍ കോണ്‍ഗ്രസിനെ പിന്തുണയ്ക്കുമെന്നും ജി.ജെ.എം നേതാവ് റോഷന്‍ ഗിരി പറഞ്ഞു.

2009 മുതല്‍ 2020വരെയുള്ള തങ്ങളുടെ ഒരു ആവശ്യവും ബി.ജെ.പി നിറവേറ്റിയില്ലെന്നും വാഗ്ദാനങ്ങള്‍ മാത്രമാണ് തന്നതെന്നും അദ്ദേഹം പറഞ്ഞു. വടക്കന്‍ ബംഗാളില്‍ മമത ബാനര്‍ജിയെ പിന്തുണയ്ക്കും. മമത വീണ്ടും മുഖ്യമന്ത്രിയായി കാണണമെന്നാണ് തങ്ങളുടെ ആഗ്രഹം എന്നും റോഷന്‍ കൂട്ടിച്ചേര്‍ത്തു.

ഗൂര്‍ഖാലാന്റ് വിഷയങ്ങളില്‍ പരിഹാരം കണ്ടെത്തുന്ന പാര്‍ട്ടിയ്ക്കായിരിക്കും 2024ലെ ലോക്സഭ തെരഞ്ഞെടുപ്പിലേക്കുള്ള പിന്തുണയെന്നും റോഷന്‍ വ്യക്തമാക്കി. 294 നിയമസഭ സീറ്റുകളുള്ള ബംഗാളില്‍ 2021ലാണ് തെരഞ്ഞെടുപ്പ് നടക്കുന്നത്. ബി.ജെ.പിയും തൃണമൂല്‍ കോണ്‍ഗ്രസും തമ്മിലാണ് പ്രധാന മത്സരം. ബംഗാള്‍ പിടിക്കുക എന്ന ലക്ഷ്യത്തോടെ ബി.ജെ.പി വന്‍ പ്രചാരണമാണ് നടത്തുന്നത്. ഇടത് പാര്‍ട്ടികള്‍ ഇത്തവണ കോണ്‍ഗ്രസുമായി ചേര്‍ന്നാണ് മത്സരിക്കുന്നത്.