മക്ക: കഅ്ബാലയത്തെ അണിയിച്ച കിസ്‌വ കഅ്ബയുമായി ബന്ധിപ്പിക്കുന്ന വെള്ളി വളയങ്ങള്‍ മാറ്റി പകരം സ്വര്‍ണ വളയങ്ങള്‍ സ്ഥാപിക്കുന്ന ജോലികള്‍ പൂര്‍ത്തിയായതായി ഹറംകാര്യ വകുപ്പ് പദ്ധതി വിഭാഗം മേധാവി എന്‍ജിനീയര്‍ അംജദ് അല്‍ഹാസിമി അറിയിച്ചു.

കഅ്ബക്ക് ചുറ്റും 'ശാദുറാന്‍' ഭാഗത്തുണ്ടായിരുന്ന വെള്ളി കൊളുത്തുകള്‍ മാറ്റിയാണ് സ്വര്‍ണം പൂശിയ കൊളുത്തുകള്‍ സ്ഥാപിച്ചത്. കിസ്‌വയെ കഅ്ബയുമായി ചേര്‍ത്ത് ഉറപ്പിച്ചു നിര്‍ത്തുന്നതിന് കെട്ടാന്‍ ഉപയോഗിക്കുന്നതാണീ കൊളുത്തുകള്‍.

ഇതിനായുള്ള 57 വെള്ളി വളയങ്ങള്‍ മാറ്റിയാണ് സ്വര്‍ണ്ണ വളയങ്ങള്‍ സ്ഥാപിച്ചിച്ചിരിക്കുന്നത്. സ്വര്‍ണ വളയങ്ങള്‍ കേടാകുന്ന പക്ഷം പകരം ഉപയോഗിക്കുന്നതിനായി 15 കൊളുത്തുകള്‍ വേറെയും ഒരുക്കി വെച്ചിട്ടുണ്ട്. ഇരുഹറം കാര്യാലയ മേധാവി ഡോ. അബ്ദുറഹ്മാന്‍ അല്‍സുദൈസിയുടെ മേല്‍നോട്ടത്തിലാണ് ശാദുറാനിലെ കൊളുത്തുകള്‍ മാറ്റുന്ന ജോലികള്‍ പൂര്‍ത്തിയാക്കിയത്.