ഇസ്‌ലാമാബാദ്: ഖജനാവ് നിറയ്ക്കാനുള്ള പുതിയ വഴികള്‍ തേടി പാകിസ്താനിലെ ഇമ്രാന്‍ ഖാന്‍ സര്‍ക്കാര്‍. നേരത്തെ, മന്ത്രിമാര്‍ക്ക് ഔദ്യോഗിക വസതികളും വാഹനങ്ങളും ഒഴിവാക്കി ചെലവുചുരുക്കല്‍ പരിപാടിക്ക് ഇമ്രാന്‍ തുടക്കമിട്ടിരുന്നു. സ്വന്തം വസതി ബിരുദാനന്തര ബിരുദ പഠനകേന്ദ്രമാക്കിയായിരുന്നു ഇമ്രാന്‍ ഇതിനു മാതൃക തുടക്കമിട്ടത്. എന്നാല്‍, അതിലേറെ കൗതുകകരമാണ് പാകിസ്താനില്‍നിന്നുള്ള പുതിയ വാര്‍ത്ത. മുന്‍ പ്രധാനമന്ത്രി നവാസ് ശരീഫിനു പാല്‍ചുരത്തിയിരുന്ന വന്‍വിലയുള്ള എട്ടോളം കന്നുകാലികളെ ലേലത്തില്‍ വച്ചിരിക്കുകയാണ് അധികൃതര്‍.
കഴിഞ്ഞ ദിവസം നടന്ന കന്നുകാലി ലേലത്തില്‍ 19,000 ഡോളറ(ഏകദേശം 13,79,162 രൂപ)ാണ് പാക് സര്‍ക്കാര്‍ ഖജനാവിലേക്കു സമാഹരിച്ചത്. പത്തുദിവസത്തിനിടെ നടക്കുന്ന രണ്ടാമത്തെ സര്‍ക്കാര്‍ ലേലമാണിത്. നേരത്തെ ബുള്ളറ്റ് പ്രൂഫ് ജീപ്പുകള്‍ അടക്കം ലേലത്തില്‍ വച്ചതില്‍നിന്ന് 6,00,000 ഡോളറാണ് (ഏകദേശം 4,35,57,000 രൂപ) സര്‍ക്കാരിനു ലഭിച്ചത്.
നവാസ് ശരീഫിന്റെ ഇഷ്ടവിനോദങ്ങളിലൊന്നായിരുന്നു മൃഗ പരിപാലനം. ഇതിന്റെ ഭാഗമായാണ് വിലയേറിയ കന്നുകാലികളെ അദ്ദേഹം വാങ്ങിയത്. ശരീഫിന് അധികാരം നഷ്ടപ്പെട്ട ശേഷവും ഈ കാലികള്‍ പ്രധാനമന്ത്രിയുടെ വസതിയിലുണ്ടായിരുന്നു. എന്നാല്‍, ചെലവുചുരുക്കല്‍ നയത്തിന്റെ ഭാഗമായി ഇവയെ ലേലത്തില്‍ വില്‍ക്കാന്‍ ഇമ്രാന്‍ ഉത്തരവിടുകയായിരുന്നു.