ലാഹോര്‍: പാകിസ്താന്‍ മുന്‍ പ്രധാനമന്ത്രി നവാസ് ഷെരീഫിനെ അഴിമതിക്കേസില്‍ കുടുക്കിയതാണെന്ന് മകളും പാകിസ്താന്‍ മുസ്‌ലിം ലീഗ് (നവാസ്) നേതാവുമായ മറിയം നവാസ്. കേസില്‍ ശിക്ഷ വിധിക്കാന്‍ ജഡ്ജി നിര്‍ബന്ധിതനായതാണെന്നും മറിയം വിഡിയോയില്‍ ആരോപിച്ചു.

ഷെരീഫിന് ശിക്ഷ വിധിക്കാനായി തന്നെ ബ്ലാക്‌മെയില്‍ ചെയ്‌തെന്ന് അക്കൗണ്ടബിലിറ്റി കോടതി ജഡ്ജി പറയുന്നതായുള്ള വിഡിയോയാണ് മറിയം നവാസ് പുറത്തുവിട്ടത്. ലാഹോറില്‍ പി.എം.എല്‍.എന്‍ നേതാക്കളോടൊപ്പം നടത്തിയ വാര്‍ത്താസമ്മേളനത്തിലാണ് മറിയം നവാസ് ഇക്കാര്യം ആരോപിച്ചത്. ജുഡീഷ്യല്‍ നടപടികള്‍ മൊത്തം അട്ടിമറിക്കപ്പെട്ടതായും അവര്‍ പറഞ്ഞു.

മൂന്ന് അഴിമതിക്കേസുകളിലൊന്നായ അല്‍ അസീസിയ മില്‍ കേസില്‍ ലാഹോര്‍ ജയിലില്‍ ഏഴ് വര്‍ഷം തടവുശിക്ഷ അനുഭവിക്കുകയാണ് നവാസ് ഷരീഫ്. 2018 ഡിസംബര്‍ 24 മുതല്‍ ഷരീഫ് ജയിലിലാണ്. ഇസ്‌ലാമാബാദിലെ അക്കൗണ്ടബിലിറ്റി കോടതി ജഡ്ജി അര്‍ഷാദ് മാലികാണ് ഷരീഫിന് ശിക്ഷ വിധിച്ചത്.

ഷരീഫിനെതിരേ കേസില്‍ തെളിവൊന്നുമില്ലെന്ന് ജഡ്ജി വിഡിയോയില്‍ പറയുന്നുണ്ട്. അതേസമയം വിഡിയോ വ്യാജമാണെന്നാണ് ഇമ്രാന്‍ഖാന്‍ സര്‍ക്കാരിന്റെ ആരോപണം. ഫോറന്‍സിക് പരിശോധന ആവശ്യമാണെന്നും ഗവണ്‍മെന്റ് വാദിക്കുന്നു. ഇസ്‌ലാമാബാദ് ഹൈക്കോടതിയിലെ ജാമ്യാപേക്ഷയില്‍ ഈ വിഡിയോ സമര്‍പ്പിക്കുമെന്ന് മറിയം നവാസ് വ്യക്തമാക്കി.