ബംഗളൂരു: കര്‍ണാടക മുന്‍ മുഖ്യമന്ത്രിയും ജനതാദള്‍(എസ്) സംസ്ഥാന പ്രസിഡന്റുമായ എച്ച്.ഡി. കുമാരസ്വാമിക്കെതിരേ കള്ളപ്പണം വെളുപ്പിച്ചതായി പരാതി. ആദായ നികുതി വകുപ്പിനാണ് ഇത്തരത്തിലുള്ള പരാതി ലഭിച്ചത്.
കുമാരസ്വാമിയുടെ ബന്ധുക്കള്‍ കള്ളപ്പണം വെളുപ്പിച്ചതായുള്ള ആരോപണത്തെ തുടര്‍ന്ന് ആദായ നികുതി വകുപ്പ് അന്വേഷണം നടത്തിയിരുന്നു. കുടുംബാംഗങ്ങളുടെ വിവിധ ബാങ്കുകളിലും ധനകാര്യ സ്ഥാപനങ്ങളിലുമുള്ള നിക്ഷേപങ്ങളെക്കുറിച്ചാണ് പ്രധാനമായും അന്വേഷിച്ചിരുന്നത്.
കള്ളപ്പണ ഇടപാടുമായി ലോകായുക്തക്ക് മുന്‍പാകെയുള്ള പരാതിയില്‍ നേരത്തെ കുമാരസ്വാമിയെ ചോദ്യം ചെയ്തിരുന്നു. ഇരുമ്പയിര് ഖന അഴിമതിയുമായി ബന്ധപ്പെട്ട് അന്വേഷണം നടത്താന്‍ പ്രത്യേക സംഘത്തെ നിയോഗിക്കാന്‍ കര്‍ണാടക പൊലിസിന് കഴിഞ്ഞ മാര്‍ച്ച് 29ന് സുപ്രിം കോടതി നിര്‍ദേശം നല്‍കിയതും കുമാരസ്വാമിക്ക് തിരിച്ചടിയാണ്. ഇതിനുപിന്നാലെയാണ് ഇപ്പോള്‍ ആദായ നികുതി വകുപ്പിന് മുന്‍പാകെ കുമാരസ്വാമിക്കെതിരേ പുതിയ കേസ് എത്തിയിരിക്കുന്നത്. 2018ല്‍ നിയമസഭാ തെരഞ്ഞെടുപ്പ് നടക്കാനിരിക്കെ അദ്ദേഹത്തിനെതിരായ കേസുകള്‍ വലിയ തിരിച്ചടിയാകുമെന്നാണ് ജനതാദള്‍ നേതൃത്വം വിലയിരുത്തുന്നത്.