വടക്കാഞ്ചേരി: ഓട്ടുപാറ ബസ് സ്റ്റാന്‍ഡ് നവീകരണ പ്രവര്‍ത്തനങ്ങള്‍ക്ക് തുടക്കമായി. ബസ് സ്റ്റാന്‍ഡിന്റെ നവീകരണ പ്രവര്‍ത്തനങ്ങളോടൊപ്പം കംഫര്‍ട്ട് സ്റ്റേഷനും ആധുനിക സൗകര്യങ്ങളോടെ പുനര്‍നിര്‍മിക്കും.
കംഫര്‍ട്ട് സ്റ്റേഷന്റെ നിര്‍മാണ പ്രവര്‍ത്തനങ്ങള്‍ ആരംഭിച്ചു കഴിഞ്ഞു. നഗരസഭയുടെ പദ്ധതി വിഹിതം 17 ലക്ഷം രൂപയും കൂടാതെ മുന്‍ എം.പി സി.പി.നാരായണന്റെ പ്രാദേശികവികസന ഫണ്ടില്‍ നിന്നും അനുവദിച്ച 27 ലക്ഷം രൂപയും ഉപയോഗിച്ചാണ് ആധൂനിക സൗകര്യങ്ങളോടെ കംഫര്‍ട്ട് സ്റ്റേഷന്‍ പുനര്‍ നിര്‍മിക്കുന്നത്.
ബസ് സ്റ്റാന്‍ഡ് നവീകരണത്തിനു നഗരസഭയുടെ വാര്‍ഷിക പദ്ധതിയില്‍ ഉള്‍പ്പെടുത്തി 17 ലക്ഷം രൂപ അനുവദിച്ചിട്ടുണ്ട്. ബസ് സ്റ്റാന്‍ഡില്‍ ടൈല്‍സ് വിരിച്ച് യാത്രകാര്‍ക്കും വാഹനങ്ങള്‍ക്കും സുരക്ഷിതത്വം ഉറപ്പാക്കും. പ്രവര്‍ത്തനങ്ങള്‍ നടക്കുന്നതിനാല്‍ ഇന്നലെ മുതല്‍ ഒരു മാസക്കാലം ഓട്ടുപാറയില്‍ ഗതാഗത നിയന്ത്രണവും ഏര്‍പ്പെടുത്തിയിട്ടുണ്ട്.