റിയാദ്: സഊദിയിൽ സ്വകാര്യ മേഖലയിൽ 15 നും 19 നും ഇടയിലുള്ള 50,758 സഊദി കൗമാരക്കാർ തൊഴിലെടുക്കുന്നതായി ജനറൽ ഓർഗനൈസേഷൻ ഫോർ സോഷ്യൽ ഇൻഷുറൻസ് (ഗോസി) റിപ്പോർട്ട്. സർക്കാർ മേഖലയിൽ 181 പേരും തൊഴിലെടുക്കുന്നുണ്ട്. ഗവണ്മെന്റ് സെക്ടറിൽ ഇതേ പ്രായത്തിലുള്ള തൊഴിലാളികളിൽ 154 പേർ പുരുഷന്മാരും 27 വനിതകളുമാണ്. അതേസമയം, 85 വയസ്സ് കഴിഞ്ഞവരും തൊഴിൽ മേഖലയിൽ സജീവമാണെന്നും കണക്കുകൾ വ്യക്തമാക്കുന്നു. സ്വകാര്യ മേഖലയിൽ 3,241 പേരാണ് വാർദ്ധക്യ സമയത്ത് തൊഴിലെടുക്കുന്നത്. ഇവരിൽ 3,125 പുരുഷന്മാരും 116 സ്‌ത്രീകളും ഉൾപ്പെടും. സർക്കാർ മേഖലയിൽ ഇതേ പ്രായക്കരായി പുരുഷന്മാരും സ്‌ത്രീകളും ഉൾപ്പെടെ 65 പേരും തൊഴിലെടുക്കുന്നുണ്ടെന്നും ഗോസി കണക്കുകൾ വ്യക്തമാക്കുന്നു. 

    20 നും 24 നും ഇടയിൽ 7,269 തൊഴിലാളികളാണ് സർക്കാർ സെക്റ്ററിൽ തൊഴിൽ മേഖലയിലുള്ളത്. ഇവരിൽ 5,548 പേർ പുരുഷന്മാരും 1,721 യുവതികളുമാണ്. 80 നും 84 നും ഇടയിൽ 40 പുരുഷന്മാരും 12 വനിതകളും ഉൾപ്പെടെ 52 തൊഴിലാളികളും സ്വകാര്യ മേഖലയിൽ സ്‌ത്രീ പുരുഷന്മാരടക്കം 4,152 പേരും തൊഴിലെടുക്കുന്നുണ്ട്. 

     രാജ്യത്ത് സർക്കാർ മേഖലയിൽ തൊഴിലെടുക്കുന്ന ആകെ തൊഴിലാളികൾ 300,357 പേരാണ്. ഇവരിൽ 75.87 ശതമാനം പുരുഷന്മാരും 24.13 ശതമാനം വനിതകളുമാണ്. 227,882 പുരുഷന്മാർ 72,475 വനിതകൾ എന്നിങ്ങനെയാണ് കണക്ക്. ഗവൺമെൻറ് മേഖലയിൽ ശരാശരി ശമ്പളം 11,754 റിയാലും സ്വകാര്യ മേഖലയിൽ 6,456 റിയാലുമാണ്.