ഹരിപ്പാട്: തോട്ടപ്പള്ളി വലിയഴീക്കല്‍ റൂട്ടില്‍ സര്‍വ്വീസ് നടത്തുന്ന സ്വകാര്യ ബസ് ജീവനക്കാര്‍ക്ക് നേരെ നിരന്തരമായി സാമൂഹിക വിരുദ്ധര്‍ നടത്തുന്ന അക്രമത്തില്‍ പ്രതിഷേധിച്ച് ഇന്ന് മുതല്‍ അനിശ്ചിതകാലത്തേക്ക് ഈ റൂട്ടില്‍ സ്വകാര്യ ബസുകള്‍ സര്‍വ്വീസ് നടത്തില്ല. അക്രമികള്‍ക്കെതിരെ ഉചിതമായ നടപടി സ്വീകരിക്കണമെന്ന് ആവശ്യപ്പെട്ട് ഹരിപ്പാട് സി.ഐ, തൃക്കുന്നപ്പുഴ എസ്.ഐ എന്നിവര്‍ക്ക് ബസ് തൊഴിലാളികള്‍ നല്‍കിയ പരാതിയിലാണ് ഇക്കാര്യം അറിയിച്ചത്.
ഈ റൂട്ടില്‍ സര്‍വ്വീസ് നടത്തുന്ന സ്വകാര്യ ബസുകളിലെ തൊഴിലാളികളെ നാട്ടുകാരില്‍ ചിലര്‍ മര്‍ദ്ദിക്കുന്നതും ബസിന് കേടുപാടുകള്‍ വരുത്തുന്നതും സ്ഥിരം സംഭവമാണെന്ന് തൊഴിലാികള്‍ പറഞ്ഞു.
ഇന്നലെയും ഒരുകൂട്ടം ആളുകള്‍ ചേര്‍ന്ന് ഒരു ബസ് ഡ്രൈവറെ അകാരണമായി മര്‍ദ്ദിച്ചതാണ് സര്‍വ്വീസ് നിര്‍ത്തിവെച്ച് പ്രതിഷേധിക്കാന്‍ കാരണം.