കോട്ടയം: കേരള പബ്ലിക്ക് ലൈബ്രറി നിയമങ്ങളും ചട്ടങ്ങളും ഇലക്ഷന്‍ നിയമങ്ങളും  ലംഘിച്ച് കോട്ടയം പബ്ലിക് ലൈബ്രറി മെയ് 14-നു നടത്തിയ തെരഞ്ഞെടുപ്പ് കോട്ടയം താലൂക്ക് ലൈബ്രറി കൗണ്‍സില്‍ റദ്ദു ചെയ്തു.  നിയമാനുസ്യതം  വീണ്ടും തെരഞ്ഞെടുപ്പ് നടത്തുന്നതിന് റിട്ടേണിംഗ് ഓഫീസറെ നിശ്ചയിക്കാനുളള മൂന്നു പേരുടെ പാനല്‍ പത്തു ദിവസങ്ങള്‍ക്കുളളില്‍ താലൂക്ക് ലൈബ്രറി കൗണ്‍സിലിന് സമര്‍പ്പിക്കണമെന്ന്  സെക്രട്ടറി സി.എം.മാത്യു അറിയിച്ചു. കേരള സര്‍ക്കാര്‍ കോട്ടയം പബ്ലിക്ക് ലൈബ്രറി സെക്രട്ടറിയുടെ പേരില്‍ 2013 മെയ് 30 ന് പുറപ്പെടുവിച്ച ഉത്തരവില്‍ ഈ ലൈബ്രറി കേരളാ ലൈബ്രറി കൗണ്‍സില്‍ 100-ാം നമ്പറായി റജിസ്റ്റര്‍ ചെയ്തിട്ടുളളതായി വ്യക്തമാക്കിയിട്ടുളളതാണ്.  എന്നാല്‍   സൊസൈറ്റീസ് ആക്ട് പ്രകാരം റജിസ്റ്റര്‍ ചെയ്ത ചാരിറ്റബിള്‍ സംഘത്തിന്റെ പല പ്രവര്‍ത്തനങ്ങളില്‍ ഒന്നു മാത്രമാണ് ലൈബ്രറി പ്രവര്‍ത്തനം എന്ന സ്ഥാപനോദ്ദേശത്തിനു വിരുദ്ധവും നിയമപരവുമല്ലാത്ത ലൈബ്രറി  മാനേജിംഗ്  കമ്മിറ്റിയുടെ പുതിയ വാദം ദുരുപദിഷ്ടവും തെറ്റിദ്ധരിപ്പിക്കാന്‍ ഉദ്ദേശിച്ചിട്ടുളളതുമാണ്. വോട്ടവകാശം ഇല്ലാത്ത സബ്‌സ്‌ക്രൈബര്‍ അംഗത്വം ജനാധിപത്യവിരുദ്ധമാണെന്നും ലൈബ്രറി കൗണ്‍സിലിന്റെ  അറിയിപ്പില്‍ പറയുന്നു.
 പബ്ലിക് ലൈബ്രറി അംഗം കെ. എസ്. പത്മകുമാറിന്റെ പരാതിയെ തുടര്‍ന്നാണ് താലൂക്ക് ലൈബ്രറി കൗണ്‍സിലിന്റെ നടപടി. പരാതിക്കാരനില്‍ നിന്നും പബ്ലിക് ലൈബ്രറിക്കുവേണ്ടി സെക്രട്ടറി സി. ജി. വാസുദേവന്‍ നായരില്‍ നിന്നും രേഖമൂലവും  നേരിട്ടും വിശദീകരണം തേടിയ ശേഷമാണ് താലൂക്ക് ലൈബ്രറി കൗണ്‍സില്‍ ഏകകണ്ഠമായി നടപടി സ്വീകരിച്ചത്.