കോഴിക്കോട്: കൊവിഡ് കാലത്ത് കെ.എം.സി.സി കമ്മിറ്റികള്‍ ചെയ്ത സേവനങ്ങളുടെ സമ്പൂര്‍ണ വിവരം മുസ്‌ലിംലീഗ് സംസ്ഥാന കമ്മിറ്റി പ്രസിദ്ധീകരിച്ചു. സംസ്ഥാന പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങളുടെ ഫേസ്ബുക്ക് പേജില്‍ പ്രകാശനം ചെയ്താണ് വിവരങ്ങള്‍ പുറത്തുവിട്ടത്.

ലോകത്തിന്റെ വിവിധ ഭാഗങ്ങളിലെ കെ.എം.സി.സി കമ്മിറ്റികള്‍ സേവന പ്രവര്‍ത്തനങ്ങള്‍ക്കായി ചെലവഴിച്ചത് 100 കോടിയിലേറെ(100,47,23,736) രൂപയാണ്.  ഇന്ത്യക്ക് പുറത്തുള്ള കെ.എം.സി.സി കമ്മിറ്റികളുടെ മാത്രം കണക്കാണിത്. രാജ്യത്തിനകത്ത് വിവിധ സംസ്ഥാനങ്ങളില്‍ എ.ഐ.കെ.എം.സി.സിയുടെ നേതൃത്വത്തിലും സേവന പ്രവര്‍ത്തനങ്ങള്‍ സജീവമായിരുന്നു. കെ.എം.സി.സിയുടെ ചാര്‍ട്ടേഡ് വിമാനങ്ങളില്‍ നാടണഞ്ഞത് 63,257 പേരാണ്. 32.2 കോടി രൂപ സൗജന്യ യാത്രികര്‍ക്കായും നിരക്ക് കുറച്ച് നല്‍കിയതിന്റെ ഫലമായും ചെലവഴിച്ചു. വന്ദേ ഭാരത് ഫ്‌ളൈറ്റ് സേവനത്തിന് ഗുണഭോക്താക്കളായി 11,559 പേരുണ്ട്. 

2.37 കോടി ഇതിനായി കെ.എം.സി.സി ചെലവഴിച്ചു. മെഡിക്കല്‍ സേവനങ്ങള്‍ (5.61 കോടി), ഹെല്‍പ്‌ഡെസ്‌ക് സര്‍വിസ് (2.58 കോടി), ക്വാറന്റൈന്‍ സഹായം (3.90 കോടി) എന്നിങ്ങനെയാണ് കണക്കുകള്‍. കൊവിഡ് കാലത്ത് 446 മൃതദേഹങ്ങളുടെ പരിചരണമാണ് കെ.എം.സി.സി നടത്തിയത്. സംസ്ഥാന ജനറല്‍ സെക്രട്ടറി കെ.പി.എ മജീദിന്റെ മേല്‍നോട്ടത്തില്‍ കെ.എം ഷാജി എം.എല്‍.എ കെ.എം.സി.സി ഘടകങ്ങളെ ഏകോപിപ്പിച്ചാണ് വിവരശേഖരണ പ്രൊജക്റ്റ് തയാറാക്കിയത്.