മുക്കം: പി.ഡി.പി മുന്‍ ജില്ലാ സെക്രട്ടറിയും കഴിഞ്ഞ നിയമസഭാ തിരഞ്ഞെടുപ്പില്‍ തിരുവമ്പാടി മണ്ഡലം പി.ഡി.പി.സ്ഥാനാര്‍ത്ഥിയുമായിരുന്ന നൗഷാദ് കൊടിയത്തൂരും പ്രവര്‍ത്തകരും പാര്‍ട്ടി വിട്ടു. കോണ്‍ഗ്രസ് പാര്‍ട്ടിയുമായി സഹകരിച്ച് പ്രവര്‍ത്തിക്കുവെന്ന് അവര്‍ മുക്കത്ത് വാര്‍ത്താ സമ്മേളനത്തില്‍ അറിയിച്ചു.
പത്തോളം പ്രവര്‍ത്തകര്‍ തന്നോടൊപ്പം പാര്‍ട്ടി വിട്ടിട്ടുണ്ടന്നും വരും ദിവസങ്ങളില്‍ കൂടുതല്‍ പേര്‍ തങ്ങളോടൊപ്പം വരുമെന്നും നൗഷാദ് കൊടിയത്തൂര്‍ പറഞ്ഞു. നിലവില്‍ വളര്‍ന്നു വരുന്ന ഫാസിസത്തേയും വര്‍ഗീയതയേയും ചെറുക്കാന്‍ കോണ്‍ഗ്രസിന് മാത്രമേ സാധിക്കൂ എന്നും പി.ഡി.പിയുടേത് അവസരവാദ രാഷ്ടീയമാണെന്നും നിലവിലെ സാഹചര്യത്തില്‍ അധികാര രാഷ്ട്രീയത്തില്‍ പി.ഡി.പിക്ക് വന്നെത്താന്‍ കഴിയില്ലെന്നും അധികാരമില്ലെങ്കില്‍ സേവന പ്രവര്‍ത്തനങ്ങള്‍ക്ക് പരിധിയുണ്ടെന്നും നൗഷാദ് പറഞ്ഞു. വാര്‍ത്താ സമ്മേളനത്തില്‍ അനീസ് ചെറുവാടി, എം.ടി. സത്താര്‍, ഇത്താലുട്ടി കറുത്ത പറമ്പ് , അബ്ദുറഹിമാന്‍ കറുത്തപറമ്പ് പങ്കെടുത്തു
അതേ സമയം പി.ഡി.പി മുന്‍ ജില്ലാ സെക്രട്ടറി നൗഷാദ് കൊടിയത്തൂരിനൊപ്പം പാര്‍ട്ടി വിട്ട എല്ലാവരും പി.ഡി.പി പ്രവര്‍ത്തകരല്ലെന്നും പ്രസ്ഥാനത്തെ തകര്‍ക്കാനുള്ള ചിലരുടെ നീക്കത്തിന്റെ ഭാഗമാണിതെന്നും പി.ഡി.പി മുക്കം മുന്‍സിപ്പാലിറ്റി കമ്മിറ്റി അറിയിച്ചു.