കൊച്ചി: ഫോര്‍ട്ട് കൊച്ചിയില്‍ നടക്കുന്ന 39-മത് സംസ്ഥാന സബ് ജൂനിയര്‍ ഫുട്‌ബോള്‍ ചാംപ്യന്‍ഷിപ്പില്‍ തിരുവനന്തപുരം ഫൈനലില്‍. ഇന്നലെ വൈകിട്ട് നടന്ന സെമി പോരാട്ടത്തില്‍ കാസര്‍കോടിനെ തകര്‍ത്താണ് തിരുവനന്തപുരം ഫൈനലില്‍ പ്രവേശിച്ചത്. എതിരില്ലാത്ത അഞ്ചു ഗോളുകള്‍ക്കായിരുന്നു തിരുവനന്തപുരത്തിന്റെ വിജയം. ജോമോന്‍, അഭിന്‍ ദാസ് എന്നിവര്‍ തിരുവനന്തപുരത്തിനായി ഇരട്ട ഗോളുകള്‍ നേടി. 3, 42 മിനുട്ടുകളില്‍ ആയിരുന്നു ജോമോന്റെ ഗോളുകള്‍. 16, 49 മിനുട്ടുകളില്‍ ആയിരുന്നു അഭിന്‍ ദാസിന്റെ ഗോളുകള്‍. കളിയുടെ അവസാന നിമിഷം ജെറിന്‍ ജോണിയും തിരുവനന്തപുരത്തിനായി ഗോള്‍ നേടി. രണ്ടാം സെമിയില്‍ എതിരില്ലാത്ത ഒരു ഗോളിന് ആതിഥേയരായ എറണാകുളത്തെ പരാജയപ്പെടുത്തി കോഴിക്കോട് ഫൈനലില്‍ പ്രവേശിച്ചു. കോഴിക്കോടിന് വേണ്ടി റഹാബാണ് ഗോള്‍ നേടിയത്.