ഗൂഡല്ലൂര്‍: നീലഗിരി മലനിരകളില്‍ സൂര്യതേജസോടെ വിളങ്ങി നില്‍ക്കുന്ന ഗൂഡല്ലൂര്‍ താലൂക്ക് മുസ്‌ലിം യതീംഖാനയുടെ തണലില്‍ മൂന്ന് നിര്‍ധന യുവതികള്‍ക്ക് കൂടി മംഗല്ല്യ സൗഭാഗ്യം. യതീംഖാനയുടെ ആഭിമുഖ്യത്തില്‍ സംഘടിപ്പിച്ച വിവാഹ സംഗമത്തില്‍ നിര്‍ധനരും നിരാലംബരുമായ മൂന്ന് യുവതികളാണ് ഇന്നലെ സുമംഗലികളായത്. വയനാട്ടിലെ ചെതലയം സ്വദേശി ജലീലും ഉപ്പട്ടിയിലെ ഷമീനയും സുല്‍ത്താന്‍ ബത്തേരി റഹ്മത്ത് നഗറിലെ അബ്ദുല്‍ വാഹിദും ദേവര്‍ഷോല ത്രീഡിവിഷനിലെ തസ്‌നിയയും പാടന്തറയിലെ നൗഷാദും പാട്ടവയലിലെ തസ്‌ലീനയുമാണ് യതീംഖാനയുടെ സ്‌നേഹത്തണലില്‍ വിവാഹജീവിതത്തിലേക്ക്  കാലെടുത്തുവച്ചത്. ഒന്നര ലക്ഷം രൂപയുടെ ആഭരണങ്ങളും വസ്ത്രങ്ങളുമാണ് വധുവിന് പാരിതോഷികമായി സംഘാടകള്‍ നല്‍കിയത്.
യതീംഖാന ജുമാ മസ്ജിദില്‍ നടന്ന നികാഹിന് അബൂബക്കര്‍ ബാഖവി, മുസ്തഫ ഉലൂമി, ഉസ്മാന്‍ ഫൈസി നേതൃത്വം നല്‍കി. സമസ്ത ജില്ലാ ജനറല്‍ സെക്രട്ടറി പി.കെ.എം ബാഖവി പ്രാര്‍ഥന നടത്തി. യതീംഖാന പ്രസിഡന്റ് കെ.പി മുഹമ്മദ് ഹാജി, അഹമദ് ഹാജി തലശ്ശേരി, പാനൂര്‍ എ.എം അബ്ദുല്‍ ബാരി, കെ ബാപ്പു ഹാജി, അലവികുട്ടി ഹാജി, കുട്ടിപ്പ, മുഹമ്മദലി, അബ്ദുല്‍ സലാം മാസ്റ്റര്‍, യതീംഖാന പ്രവര്‍ത്തക സമിതി അംഗങ്ങള്‍, ജനറല്‍ ബോഡി അംഗങ്ങള്‍, മറ്റ് മഹല്ല് പ്രതിനിധികള്‍ നിക്കാഹ് കര്‍മത്തിന് സാക്ഷികളായി