ഭോപ്പാല്‍: സിനിമാ താരവും ദേശീയ അവാര്‍ഡ് ജേതാവുമായ അക്ഷയ് കുമാറിനും, ബാഡ്മിന്റല്‍ താരം സൈന നെഹ് വാളിനും മാവോയിസ്റ്റ് ഭീഷണി. ഛത്തീസ്ഘട്ടില്‍ മാവോയിസ്റ്റ് ഏറ്റുമുട്ടലില്‍ കൊല്ലപ്പെട്ട 12 സിആര്‍പിഎഫ് ജവാന്‍മാരുടെ കുടുംബങ്ങള്‍ക്ക് ഇരുവരും സാമ്പത്തിക സഹായം നല്‍കിയതുമായി ബന്ധപ്പെട്ടാണ് ഭീഷണി.

ഛത്തീസ്ഘട്ടിലെ സി.പി.ഐ( മാവോയിസ്റ്റ്) സൗത്ത് സോണല്‍ കമ്മറ്റിയാണ് ഭീഷണി സന്ദേശം അയച്ചിരിക്കുന്നത്. ഇരുവര്‍ക്കും എതിരായ ഭീഷണി സന്ദേശമുള്‍പ്പെട്ട മാവോയിസ്റ്റ് ലഘുലേഖ കഴിഞ്ഞ ആഴ്ച്ച വിവിധ പ്രദേശങ്ങളില്‍ നിന്നായി ലഭിച്ചുവെന്ന് പൊലിസ് വ്യക്തമാക്കി. ഹിന്ദിയിലും, ഗോത്രഭാഷയായ ഗോണ്ടിയിലുമാണ് ലഘുലേഖ പുറത്തിറക്കിയിരിക്കുന്നത്.

അക്ഷയ് കുമാര്‍ കൊല്ലപ്പെട്ട ജവാന്മാരുടെ കുടുംബങ്ങള്‍ക്ക് പത്തുലക്ഷം രൂപ വീതവും സൈന 50,000 രൂപയുമാണ് ധനസഹായം പ്രഖ്യാപിച്ചിരുന്നത്.

മാര്‍ച്ച് 11നാണ് സുക്മയില്‍ മാവോയിസ്റ്റുകളുമായുള്ള ഏറ്റുമുട്ടലില്‍ 12 ജവാന്മാര്‍ കൊല്ലപ്പെട്ടത്. സി.ആര്‍.പി.എഫ് പട്രോളിംഗിനിടെ മാരകായുധങ്ങളുമായി എത്തിയ മാവോയിസ്റ്റ് സംഘം ആക്രമണം നടത്തുകയായിരുന്നു.