കൊണ്ടോട്ടി: സംസ്ഥാന അക്വാട്ടിക്ക് അസോസിയേഷന്‍ സംഘടിപ്പിച്ച മാസ്റ്റേഴ്‌സ് അക്വാട്ടിക് ചാംപ്യന്‍ഷിപ്പില്‍ മെഡല്‍ നേടി നെടിയിരുപ്പ് സ്വദേശി.
കാരിമുക്ക് കൊടക്കാടന്‍ മുഹമ്മദ് റഫീഖ് ആണ് മെഡലുകള്‍ വാരിയത്. 100 മീറ്റര്‍ ബട്ടര്‍ഫ്‌ളൈ സ്‌ട്രോക്കില്‍ സ്വര്‍ണം, 50 മീറ്റര്‍ ബട്ടര്‍ഫ്‌ളൈ സ്‌ട്രോക്കിലും 50 മീറ്റര്‍ ഫ്രീസ്‌റ്റൈലിലും വെള്ളി എന്നിങ്ങനെയാണ് മുഹമ്മദ് റഫീഖിന്റെ മെഡല്‍ നേട്ടം. മഞ്ചേരിയില്‍ നടന്ന ജില്ലാ തല മത്സരങ്ങളില്‍ ഒന്നാമനായാണ് റഫീഖ് സംസ്ഥാനതലത്തില്‍ മത്സരത്തിനിറങ്ങിയത്.
2014-ലും 2012-ലും ദേശീയതലത്തില്‍ സ്വര്‍ണം വെള്ളി മെഡലുകള്‍ നേടിയിട്ടുണ്ട്. ഇത്തവണയും ദേശീയ മത്സരങ്ങളില്‍ പങ്കെടുക്കാനുള്ള തയാറെടുപ്പിലാണ് താരം.
കാരിമുക്കിലെ പൊതുകുളത്തില്‍ പരിശീലനം നടത്തിയാണ് റഫീഖ് സംസ്ഥാന, ദേശീയ മത്സരങ്ങളില്‍ പങ്കെടുക്കുന്നത്. ചെരുപ്പ് ഡിസൈനറായാണ് ഈ 39-കാരന്‍ ഉപജീവനം കഴിക്കുന്നത്.