സൂറിച്ച്: നീതി വേണമെന്നാവശ്യപ്പെട്ട് അഞ്ച് ഐ ലീഗ് ക്ലബുകള്‍ ഫിഫ പ്രസിഡന്റ് ഇന്‍ഫാന്റീഞ്ഞോയെ സപീച്ചതില്‍ മറുപടിയുമായി ഫിഫ. ഗോകുലം കേരള എഫ്.സി ഉള്‍പ്പെടെയുള്ള അഞ്ച് ഐ ലീഗ് ക്ലബുകളായിരുന്നു ഐ ലീഗിനെ സെക്കന്‍ഡ് ഡിവിഷനാക്കി തരം താഴ്ത്താനുള്ള ഇന്ത്യന്‍ ഫുട്‌ബോള്‍ ഫെഡറേഷന്റെ നടപടി അവസാനിപ്പിക്കണമെന്നാവശ്യപ്പെട്ട് കൊണ്ട് പ്രസിഡന്റ് ഇന്‍ഫാന്റീഞ്ഞോക്ക് കത്ത് നല്‍കിയത്. ഇതിന് മറുപടിയായി ഫിഫ ഇന്ത്യയിലെ ലീഗുകളുടെ നിലവിലെ അവസ്ഥയെ കുറിച്ച് റിപ്പോര്‍ട്ട് നല്‍കാന്‍ ആവശ്യപ്പെട്ടിട്ടുണ്ട്. 2018ല്‍ ഇന്ത്യയിലെ ക്ലബുകള്‍ക്കിടയില്‍ ലയനമാണ് വേണ്ടതെന്ന നിര്‍ദേശം ഫിഫ വച്ചിരുന്നു.
എന്നാല്‍ ഈ നടപടി ഇന്ത്യന്‍ ഫുട്‌ബോള്‍ ഫെഡറേഷന്‍ അംഗീകരിച്ചിട്ടില്ല. കഴിഞ്ഞ ദിവസം അയച്ച കത്തിലും ഫിഫ ഇക്കാര്യം സൂചിപ്പിച്ചിട്ടുണ്ട്. ഐ ലീഗ് ക്ലബുകളെ തരംതാഴ്ത്താനുള്ള ഇന്ത്യന്‍ ഫുട്‌ബോള്‍ ഫെഡറേഷന്റെ നീക്കം ഇപ്പോള്‍ പുതിയ വഴിത്തിരിവിലേക്കെത്തിയിരിക്കുകയാണ്. ഐ ലീഗ് ക്ലബുകളെ രക്ഷിക്കണമെന്നാവശ്യപ്പെട്ട് കൊണ്ട് ഇതേ ക്ലബുകള്‍ ഇന്ത്യന്‍ പ്രധാനമന്ത്രിക്കും കത്തയച്ചിരുന്നു. എന്നാല്‍ ഇക്കാര്യത്തില്‍ പുതിയ നടപടികളൊന്നും ഉണ്ടായിട്ടില്ല. ഐ.എസ്.എല്ലിനെ രാജ്യത്തെ ഒന്നാം നമ്പര്‍ ലീഗാക്കി ഉയര്‍ത്തി എ.എഫ്.സി യോഗ്യത ഐ.എസ്.എല്‍ ചാംപ്യന്‍മാര്‍ക്ക് നല്‍കുവാനുള്ള ഒരുക്കത്തിലാണ് ഇന്ത്യന്‍ ഫുട്‌ബോള്‍ ഫെഡറേഷന്‍. ഇങ്ങനെ വരുകയാണെങ്കില്‍ ഐ ലീഗ് ക്ലബുകളെ രണ്ടാം ഡിവിഷനാക്കേണ്ടി വരും. ഇതിനെതിരെയുള്ള പോരാട്ടത്തിലാണ് ഐ ലീഗ് ക്ലബുകള്‍.