ന്യൂഡല്‍ഹി: ബാങ്ക് അക്കൗണ്ടും മൊബൈല്‍ നമ്പറും ആധാറുമായി ബന്ധിപ്പിക്കാന്‍ പാര്‍ലമെന്റ് അംഗീകാരത്തോടെയുള്ള നിയമം വഴി കഴിയുമെന്ന് കേന്ദ്ര ധനമന്ത്രി അരുണ്‍ ജെയ്റ്റ്‌ലി.
സുപ്രിംകോടതി വിധിയുടെ അടിസ്ഥാനത്തില്‍ ആധാര്‍ വിവരങ്ങള്‍ സ്വകാര്യ കമ്പനികള്‍ ശേഖരിക്കുന്നതിലെ തടസം നിയമം വഴി മറികടക്കാനാകുമെന്നും അദ്ദേഹം വ്യക്തമാക്കി. എന്നാല്‍ ഇതിനായി കേന്ദ്ര സര്‍ക്കാര്‍ നിയമനിര്‍മാണം നടത്തുമോയെന്ന കാര്യത്തില്‍ നിലപാട് വ്യക്തമാക്കാന്‍ അദ്ദേഹം തയാറായില്ല.
കഴിഞ്ഞ മാസമാണ് ബാങ്ക് അക്കൗണ്ടും മൊബൈല്‍ നമ്പറും ആധാറുമായി ബന്ധിപ്പിക്കേണ്ടതില്ലെന്ന് സുപ്രിംകോടതി വ്യക്തമാക്കിയിരുന്നു. സ്വകാര്യ കമ്പനികള്‍ വ്യക്തികളുടെ ആധാര്‍ വിവരങ്ങള്‍ ഏതെങ്കിലും കരാര്‍ പ്രകാരം സ്വന്തമാക്കുന്നത് തടഞ്ഞ കോടതി ഇതുമായി ബന്ധപ്പെട്ട നിയമത്തിലെ 57ാം വകുപ്പ് റദ്ദാക്കുകയും ചെയ്തിരുന്നു.
എന്നാല്‍ ആധാര്‍ എന്നത് പൗരത്വ കാര്‍ഡല്ല. എന്നാല്‍ സര്‍ക്കാരുമായി ബന്ധപ്പെട്ട കാര്യത്തിനും പണമിടപാട് ഉള്‍പ്പെടെയുള്ള കാര്യത്തിനും ആധാര്‍ ഉപയോഗപ്പെടുത്താന്‍ കഴിയും. ജനങ്ങള്‍ക്ക് ലഭിക്കുന്ന സബ്‌സിഡിക്കും ആധാര്‍ ആവശ്യമാണ്.