പുതുക്കാട് : ശബരിമല സംരക്ഷണസമിതി ആമ്പല്ലൂര്‍ മേഖല കമ്മിറ്റിയുടെ നേതൃത്വത്തില്‍ നാമജപ ഘോഷയാത്രയും സത്യാഗ്രഹവും സംഘടിപ്പിച്ചു.
ആമ്പല്ലൂര്‍ കുണ്ടുകാവ് ഭഗവതി ക്ഷേത്രത്തില്‍ നിന്ന് പുതുക്കാട് വരെ പ്രതിഷേധക്കാര്‍ ശരണംവിളിച്ചും നാമജപം ചൊല്ലിയും ഘോഷയാത്രയില്‍ പങ്കെടുത്തു. സ്ത്രീകളടക്കം നൂറുക്കണക്കിന് വിശ്വാസികള്‍ അണിചേര്‍ന്ന പ്രതിഷേധം ടി.ആര്‍ രാമനാഥന്‍ ഉദ്ഘാടനം ചെയ്തു. സി. മുരളി അധ്യക്ഷനായി. ചെങ്ങാലൂര്‍ മറവാഞ്ചേരി മഹാദേവ ക്ഷേത്ര പരിസരത്ത് നാമജപവും, കര്‍പ്പൂര അര്‍ച്ചനയും നടന്നു. ജയരാജ് ശാന്തി ഉദ്ഘാടനം ചെയ്തു. ബാബു, ബേബി കീടായില്‍ എന്നിവര്‍ സംസാരിച്ചു. ശബരിമലയില്‍ സ്ത്രീ പ്രവേശന വിധിയ്‌ക്കെതിരേ ദേവസ്വം ബോര്‍ഡ് റിവ്യു ഹര്‍ജി നല്‍കാത്തതില്‍ പ്രതിഷേധിച്ച് തെക്കെ തൊറവില്‍ അയ്യപ്പസേവാ സംഘം നാമജപ ഘോഷയാത്ര സംഘടിപ്പിച്ചു. നരിപ്പറ്റ മഹാദേവ ക്ഷേത്രത്തില്‍ നിന്നാരംഭിച്ച ഘോഷയാത്ര പള്ളത്ത് നരസിംഹമൂര്‍ത്തി ക്ഷേത്രത്തിലും വള്ളിക്കുന്നത്ത് മഹാവിഷ്ണു ക്ഷേത്രത്തിലും പ്രവേശിച്ചു.ഇതിനിടെ തെക്കെ തൊറവ് സെന്റ് ആന്റണീസ് പള്ളിയില്‍ പ്രതിഷേധക്കാര്‍ക്ക് ദാഹജലം ഒരുക്കിയത് ശ്രദ്ധേയമായി. പ്രതിഷേധ യോഗത്തില്‍ നടുവം ഹരി, സി.കെ.സുനില്‍,ആനന്ദ് മാളിയേക്കല്‍ എന്നിവര്‍ സംസാരിച്ചു. ശബരിമലയില്‍ സ്ത്രീ പ്രവേശനമാകാമെന്ന് നിലപാട് തിരുത്തി എല്‍.ഡി.എഫ് സര്‍ക്കാര്‍ പുനഃപരിശോധന ഹര്‍ജി നല്‍കണമെന്ന് ആവശ്യപ്പെട്ട് യൂത്ത് കോണ്‍ഗ്രസ് തൃക്കൂര്‍ മണ്ഡലം കമ്മിറ്റി ഏകദിന ഉപവാസം നടത്തി. കെ.പി.സി.സി അംഗം സി.ഐ സെബാസ്റ്റ്യന്‍ ഉദ്ഘാടനം ചെയ്തു. മണ്ഡലം പ്രസിഡന്റ് കെ.എ ജോണ്‍ പോള്‍ അധ്യക്ഷനായി. ഇ.എം ഉമ്മര്‍,സുധന്‍ കാരയില്‍,ബലറാം സ്വാമി എന്നിവര്‍ സംസാരിച്ചു. ശബരിമല സ്ത്രീ പ്രവേശന വിഷയവുമായി ബന്ധപ്പെട്ട് അയ്യപ്പ ഭക്തരുടെ പ്രതിഷേധ കൂട്ടായ്മ മുത്രത്തിക്കര മഹാദേവ ക്ഷേത്രം അഗ്രശാലയില്‍ നടന്നു. കെ.ആര്‍ കൃഷ്ണന്‍ നമ്പൂതിരി അധ്യക്ഷനായിരുന്നു. രാഷ്ട്രീയ സാംസ്‌കാരിക, സാമുദായിക സംഘടന പ്രിതിനിധികള്‍ യോഗത്തില്‍ പങ്കെടുത്തു.
എടതിരിഞ്ഞി: ശബരിമലയിലെ ആചാരാനുഷ്ടാനങ്ങളില്‍ മാറ്റം വരുത്താതെ പഴയതുപോലെ നിലനിര്‍ത്തുക, യുവതികളായ സ്ത്രീകളുടെ ശബരിമല ക്ഷേത്രപ്രവേശനത്തിനുള്ള കോടതി വിധി പുനഃപരിശോധിക്കുക തുടങ്ങിയ ആവശ്യങ്ങള്‍ ഉന്നയിച്ച് പോത്താനിയിലെ അയ്യപ്പഭക്തരുടെ നേതൃത്വത്തില്‍ പ്രതിഷേധ നാമജപയാത്ര സംഘടിപ്പിച്ചു.
പോത്താനി ശിവക്ഷേത്രപരിസരത്ത് നിന്ന് ആരംഭിച്ച് എടതിരിഞ്ഞി ശിവകുമാരേശ്വര ക്ഷേത്ര സന്നിധിയില്‍ അവസാനിച്ചു. മധുസൂധനന്‍ പൊതുവത്ത്, തിലകന്‍ കൈമാപ്പറമ്പില്‍, ഷാജി മന്നപ്പുള്ളി, രഞ്ജിത്ത് രാധാകൃഷ്ണന്‍, ശാന്താകുമാരി, തങ്കം കാര്‍ത്തികേയന്‍ തുടങ്ങിയവര്‍ നേതൃത്വം നല്‍കി.