പുല്‍പ്പള്ളി: പാക്കം പുഴമൂല പ്രദേശങ്ങളില്‍ കാട്ടാനശല്യം രൂക്ഷമായതോടെ പകല്‍ പോലും പുറത്തിറങ്ങനാവാതെ ജനങ്ങള്‍ ദുരിതത്തില്‍.
കഴിഞ്ഞ ദിവസം പാക്കം പുഴമൂല കോളനി പ്രദേശത്തെ നിരവധി കര്‍ഷകരുടെ തെങ്ങ്, വാഴ, കമുക്, നെല്‍കൃഷി ഉള്‍പ്പടെയുള്ള കാര്‍ഷിക വിളകളാണ് കാട്ടാന വ്യാപകമായി നശിപ്പിച്ചത്.കുറുവ പാക്കം വനമേഖലയില്‍ നിന്നുമിറങ്ങുന്ന ആനകള്‍ നേരം പുലര്‍ന്നിട്ടും കൃഷിയിടങ്ങളില്‍ നിന്ന് പിന്‍വാങ്ങാത്തതിനാല്‍ ക്ഷീരകര്‍ഷകര്‍ക്ക് പാല്‍ അളക്കാന്‍ പോലും പോകാന്‍ കഴിയാത്ത അവസ്ഥയാണ്. കാലവര്‍ഷത്തില്‍ വനാതിര്‍ത്തികളില്‍ സ്ഥാപിച്ച ട്രഞ്ചുകളും ഫെന്‍സിങും തകര്‍ന്നതോടെയാണ് കാട്ടാനകള്‍ കൂട്ടത്തോടെ കൃഷിയിടത്തിലിറങ്ങാന്‍ കാരണം.
നിത്യേനയിറങ്ങുന്ന കാട്ടാനകള്‍ കൃഷിയിടത്തിലെ വിളകള്‍ വ്യാപകമായി നശിപ്പിക്കുന്നതിന് പരിഹാരം കാണാന്‍ വനം വകുപ്പ് അടിയന്തര നടപടി സ്വികരിക്കണമെന്നാണ് പ്രദേശത്തെ ജനങ്ങളുടെ ആവശ്യം.