കൊച്ചി: സാലറി ചലഞ്ചില്‍ നിര്‍ബന്ധിത പിരിവ് അനുവദിക്കാനാവില്ലെന്ന് ആവര്‍ത്തിച്ച് ഹൈക്കോടതി. സര്‍ക്കാര്‍ നടപടികളില്‍ നിര്‍ബന്ധബുദ്ധിയുണ്ടെന്നാണ് പ്രഥമദൃഷ്ട്യാ ബോധ്യപ്പെടുന്നത്. ജീവനക്കാരുടെ സാമ്പത്തിക പരാധീനത കൂടി സര്‍ക്കാര്‍ കണക്കിലെടുക്കണം. ഒരു മാസത്തെ ശമ്പളം നല്‍കണമെന്ന് പറയുന്നത് നിര്‍ബന്ധിത പിരിവാണെന്നും കോടതി നിരീക്ഷിച്ചു.

മുഖ്യമന്ത്രിയുടെ ദുരിതാശ്വസ നിധിയിലേക്കുള്ള സാലറി ചലഞ്ചിന്റെ പേരില്‍ നിര്‍ബന്ധിത പണപ്പിരിവ് നടത്തുന്നുവെന്ന് ആരോപിച്ച് എന്‍.ജി.ഒ സംഘടന നല്‍കിയ ഹരജി പരിഗണിക്കവെയാണ് കോടതിയുടെ നിരീക്ഷണം.

സലറി ചലഞ്ച് പണം നല്‍കിയത് സര്‍വ്വീസ് ബുക്കില്‍ രേഖപ്പെടുത്താനുള്ള നീക്കം നടക്കുന്നവെന്ന റിപ്പോര്‍ട്ടുകള്‍ പുറത്തു വരുന്നതിനിടെയാണ് ഹൈക്കോടതിയുടെ പരാമര്‍ശം.

സാലറി ചലഞ്ചില്‍ ശമ്പളം നല്‍കാത്തവരുടെ പട്ടിക തയാറാക്കിയതെന്തിനെന്ന് സര്‍ക്കാരിനോട് ഹൈക്കോടതി കഴിഞ്ഞ ദിവസം ചോദിച്ചിരുന്നു. ദുരിതാശ്വാസത്തിന്റെ പേരില്‍ നിര്‍ബന്ധിത പിരിവ് പാടില്ലെന്നും പറഞ്ഞ കോടതി പട്ടിക പുറത്തുവിടരുതെന്ന് നിര്‍ദേശം നല്‍കുകയും ചെയ്തിരുന്നു.