തലശ്ശേരി: തലശ്ശേരി നഗരസഭയില്‍ പ്ലാസ്റ്റിക്ക് നിരോധനത്തിന്റെ ഭാഗമായി വ്യാപാരികളും ആരോഗ്യ വിഭാഗവും കൊമ്പു കോര്‍ക്കുന്നു.
നിരോധനം ലംഘിച്ച് പ്ലാസ്റ്റിക് ക്യാരിബാഗുകള്‍ കൈവശം വെക്കുകയും വില്‍പന നടത്തുകയും ചെയ്യുന്നവരുടെ ലൈസന്‍സ് റദ്ദ് ചെയ്യാനാണ് നഗരസഭയുടെ നീക്കം. കഴിഞ്ഞ ദിവസങ്ങളില്‍ നഗരത്തില്‍ നടത്തിയ റെയ്ഡില്‍ രണ്ടര ക്വിന്റലിലേറെ നിരോധിത ക്യാരി ബാഗുകള്‍ പിടിച്ചെടുത്തതായി നഗരസഭാ ആരോഗ്യ വിഭാഗം ഉദ്യോഗസ്ഥര്‍ വെളിപ്പെടുത്തി. കഴിഞ്ഞ ഏപ്രില്‍ 12ന് നിരോധനം നിലവില്‍ വന്നെങ്കിലും മെയ് അവസാനത്തോടെയാണ് തലശ്ശേരി നഗരത്തില്‍ തീരുമാനം പ്രാബല്യത്തില്‍ വന്നത്. നഗരത്തിലുള്ള വ്യാപാരികളില്‍ 20 ശതമാനം പേര്‍ ഇതിനോട് സഹകരിക്കുന്നില്ലെന്നും ആരോഗ്യ വിഭാഗം ഉദ്യോഗസ്ഥര്‍ പറയുന്നു.
അന്യ സംസ്ഥാനങ്ങളില്‍ നിന്നു പ്രിന്റ് ചെയ്ത് കൊണ്ട് വന്ന ക്യാരി ബാഗുകള്‍ സ്റ്റോക്ക് തീരുന്നതുവരെ വിറ്റഴിക്കുമെന്നും ചില വ്യാപാരികള്‍ ഭീഷണി മുഴക്കിയതായും ആരോഗ്യ വിഭാഗം ഉദ്യോഗസ്ഥര്‍ പറഞ്ഞു. എന്നാല്‍ അടുത്ത ദിവസങ്ങളില്‍ പ്ലാസ്റ്റിക്ക് ക്യാരി ബാഗുകള്‍ നില്‍പ്പന നടത്തുന്ന കടകളില്‍ വീണ്ടും പരിശോധന നടത്തുമെന്നും പ്ലാസ്റ്റിക് ക്യാരി ബാഗുകള്‍ പിടിക്കപ്പെട്ടാല്‍ കടകളുടെ ലൈസന്‍സ് റദ്ദ് ചെയ്യുമെന്നും നഗരസഭാ ആരോഗ്യ വിഭാഗം അറിയിച്ചു. അതേസമയം പ്ലാസ്റ്റിക്ക് നിരോധനം മത്സ്യ മാര്‍ക്കറ്റ് പോലുള്ള സ്ഥലങ്ങളില്‍ ഏറെ പ്രതിസന്ധി സൃഷ്ടിച്ചിരിക്കുകയാണ്. നിരോധനം ശക്തമാക്കുന്നത് വ്യാപരികളും നഗരസഭയും തമ്മിലുള്ള ശീതസമരത്തിന് വഴിയൊരുക്കുമെന്നുറപ്പാണ്. കഴിഞ്ഞ ദിവസം മത്സ്യ മാര്‍ക്കറ്റില്‍ പ്ലാസ്റ്റിക് സഞ്ചികള്‍ പിടിച്ചെടുക്കാനെത്തിയ ആരോഗ്യ വിഭാഗം ഉദ്യോഗസ്ഥരുമായി വ്യാപാരികള്‍ കൈയ്യാങ്കളിയുടെ വക്കോളമെത്തിയിരുന്നു.