തൃശൂര്‍: യുവ സംവിധായകന്‍ നിഷാദ് ഹസനെ തട്ടിക്കൊണ്ടുപോയതായി പരാതി. തൃശൂര്‍ പാവറട്ടിയില്‍ നിന്നാണ് തട്ടിക്കൊണ്ടു പോയത്. ഇന്നു പുലര്‍ച്ചെയാണ് സംഭവം.

ഭാര്യയ്‌ക്കൊപ്പം കാറില്‍ പോവുന്നതിനിടെയാണ് ഇയാളെ ആക്രമിച്ച് തട്ടിക്കൊണ്ടു പോയത്. ചിറ്റിലപ്പിള്ളി മുള്ളയൂര്‍ക്കായലിന് സമീപത്തെത്തിയപ്പോള്‍, കാറിലെത്തിയ സംഘം വളഞ്ഞ് ഇരുവരെയും മര്‍ദിച്ച് നിഷാദ് ഹസനെ തട്ടിക്കൊണ്ടു പോവുകയായിരുന്നു.

വിപ്ലവം ജയിക്കാനുള്ളതാണ് എന്ന പുതിയ സിനിമയുടെ സംവിധായകനാണ് നിഷാദ് ഹസന്‍. ഇതിന്റെ നിര്‍മാതാവുമായി തര്‍ക്കമുണ്ടായിരുന്നുവെന്നാണ് സൂചന.

മര്‍ദനമേറ്റ നിഷാദ് ഹസന്റെ ഭാര്യയ്ക്കും തൃശൂരിലെ സ്വകാര്യ ആശുപത്രിയില്‍ ചികിത്സ തേടി. സംഭവത്തില്‍ പേരാമംഗലം പൊലിസ് അന്വേഷണം തുടങ്ങി.