തിരുവനന്തപുരം: ചന്ദ്രനിലേക്ക് അയക്കുമെന്ന പരാമര്‍ശത്തെക്കുറിച്ച് ചോദിച്ചപ്പോള്‍, അത് അടഞ്ഞ അധ്യായമാണെന്ന ബി.ജെ.പി സംസ്ഥാന അധ്യക്ഷന്‍ പി.എസ് ശ്രീധരന്‍പിള്ളയുടെ പ്രസ്താവനയെ കളിയാക്കി സംവിധായകന്‍ അടൂര്‍ ഗോപാലകൃഷ്ണന്‍ രംഗത്ത്. ജയ് ശ്രീറാം കൊലവിളിയായി ഉപയോഗിക്കുന്നതിനെതിരെയാണ് പ്രധാനമന്ത്രി നരേന്ദ്ര മോദിക്ക് അടൂര്‍ കത്തെഴുതിയത്. ഇതിനു പിന്നാലെ, അടൂരിനെ ചന്ദ്രനിലേക്ക് അയക്കണമെന്ന പ്രസ്താവനയുമായി ബി.ജെ.പി നേതാവ് ബി. ഗോപാലകൃഷ്ണന്‍ പറഞ്ഞത് വിവാദമായിരുന്നു.

ചന്ദ്രനിലേക്ക് പോകാന്‍ തയ്യാറായി ടിക്കറ്റും കാത്തിരിക്കുകയായിരുന്നു, ആ അധ്യായം മടക്കിയെന്ന് അവരുടെ തന്നെ നേതാവ് പറഞ്ഞത് കഷ്ടമായി പോയെന്നും അടൂര്‍ പറഞ്ഞു.

അമ്പിളിമാമനോട് കുഞ്ഞുനാള്‍ മുതല്‍ക്കെ വൈകാരിക ബന്ധമുണ്ട്. കുഞ്ഞുങ്ങള്‍ കരയുമ്പോള്‍ അമ്പിളിമാമനെ കാണിച്ചാണ് അമ്മമാര്‍ സാന്ത്വനപ്പെടുത്താറ്. അങ്ങനെയുള്ള സ്ഥലത്തേക്ക് പോകാന്‍ സാധിക്കുന്നത് വലിയ ഭാഗ്യമല്ലേ എന്ന് അടൂര്‍ ചോദിക്കുന്നു. ആരേയും കുറ്റം പറയാനോ, ഭരണത്തെ ചോദ്യം ചെയ്യാനോ അല്ല പ്രധാനമന്ത്രിക്ക് കത്തെഴുതിയത്. രാമനാമം കൊലവിളിയായി ഉപയോഗിക്കുന്നത് ശരിയല്ലെന്ന് ചൂണ്ടിക്കാണിക്കാനായിരുന്നു അതെന്നും അദ്ദേഹം പറഞ്ഞു. പിന്നെയും എന്ന തന്റെ തിരക്കഥാ പുസ്തകത്തിന്റെ പ്രകാശന ചടങ്ങിലാണ് അടൂരിന്റെ പ്രതികരണം.

സാധുക്കളെ കൂട്ടംകൂടി അടിച്ചുകൊല്ലുന്നത് കണ്ടുനില്‍ക്കാനാവില്ല. രാമനെ അറിയാത്തവരും, രാമായണം വായിക്കാത്തവരുമാണ് ഇതിന് പിന്നില്‍. ഇഷ്ടമില്ലാത്ത കാര്യം പറയുന്നവരെ ദേശദ്രോഹികളായി മുദ്രകുത്തരുത്. ഇത്തരം മനോഭാവങ്ങള്‍ക്കെതിരെ കേരളം ഒറ്റകെട്ടായി നിലകൊള്ളുന്നു എന്നത് സന്തോഷകരമാണെന്നും അടൂര്‍ പറഞ്ഞു.