കോട്ടയം: മെത്രാന്‍കായല്‍ ഭൂമി കൈവശം വച്ചിരിക്കുന്ന ഭൂമാഫിയയ്‌ക്കെതിരേ വീണ്ടും കൃഷി മന്ത്രി വി.എസ് സുനില്‍കുമാര്‍. ആരും മെത്രാന്‍ കായല്‍ ഭൂമി ദുരുപയോഗം ചെയ്യാമെന്ന് കരുതേണ്ടെന്നും അത്തരക്കാരുടെ ആഗ്രഹങ്ങള്‍ ഈ സര്‍ക്കാരിന്റെ കാലത്ത് നടപ്പാകില്ലെന്നും മന്ത്രി ഓര്‍മിപ്പിച്ചു. നെല്‍വയല്‍ കൈവശമുള്ളവര്‍ മറ്റുചില ആവശ്യങ്ങള്‍ക്കായി നിയമത്തെ കബിളിപ്പിക്കുന്നതിന് ഉദാഹരണമാണ് മെത്രാന്‍ കായലെന്ന് മന്ത്രി കോട്ടയത്ത് പറഞ്ഞു. അസോസിയേഷന്‍ ഓഫ് അഗ്രികള്‍ച്ചറല്‍ ഓഫിസേഴ്‌സ് കേരളയുടെ സംസ്ഥാന സമ്മേളനം ഉദ്ഘാടനം ചെയ്ത്് സംസാരിക്കുകയായിരുന്നു അദ്ദേഹം.

 നിയമത്തെ മറികടന്നുകൊണ്ട് സര്‍ക്കാരിനെ കബിളിപ്പിക്കാന്‍ ആരും വിചാരിക്കേണ്ട. മെത്രാന്‍കായലില്‍ ഒരു കമ്പനിക്ക് 15 ഏക്കറില്‍ താഴെ മാത്രം നെല്‍വയല്‍ കൈവശം വെക്കാനേ സാധ്യമാകൂ. ഈ നിയമത്തെ മറികടന്നാണ് ഇവിടെ ചിലര്‍ ഭൂമി കൈവശം വച്ചിരിക്കുന്നത്.   മെത്രാന്‍ കായലില്‍ 80 ലക്ഷം ചെലവാക്കി കൃഷി ഇറക്കാന്‍ എല്‍.ഡി.എഫ് സര്‍ക്കാര്‍ മുന്‍പോട്ട് വന്നിരിക്കുന്നത് ഭൂമാഫിയയ്ക്കുള്ള താക്കീതുകൂടിയാണെന്ന് അദ്ദേഹം ഓര്‍മിപ്പിച്ചു.

35 ഏക്കറിന് വേണ്ടി 80 ലക്ഷം ചെലവാക്കുന്നത് സര്‍ക്കാര്‍ നയത്തിന്റെ ഭാഗം. എന്ത് ന്യായീകരണം പറഞ്ഞാലും ഇവിടെ കൃഷിയിറക്കും. മാത്രമല്ല, അടുത്ത വര്‍ഷം 5 കോടി രൂപ ചെലവാക്കി ഇവിടെ സ്ഥിരമായി കൃഷിയിറക്കും. ഇതോടെ മെത്രാന്‍ കായലിലില്‍ കൃഷി മാത്രമാകും സാധിക്കുക എന്ന് ഉടമസ്ഥര്‍ക്ക് വ്യക്തമാകും. നിലവില്‍ ഭൂമി കൈവശം വച്ചിരിക്കുന്ന ഭൂമാഫിയകളും കൃഷി ചെയ്യാന്‍ ബാധ്യസ്ഥരാകുമെന്നും അദ്ദേഹം പറഞ്ഞു.

 സംസ്ഥാനത്തെ കാര്‍ഷിക മാര്‍ക്കറ്റിങ് രീതിയില്‍ മാറ്റം ഉണ്ടാവണമെന്നും മന്ത്രി വ്യക്തമാക്കി. ഇക്കാര്യത്തില്‍ സ്വയം വിമര്‍ശനത്തിന് ഉദ്യോഗസ്ഥര്‍ തയാറാകണം. സംസ്ഥാനത്തിന് മാര്‍ക്കറ്റിങ് വിഭാഗം ഉണ്ടായിട്ടും വേണ്ട നടപടി സ്വീകരിക്കാത്തതാണ് ഇതിന് കാരണം. അതിനാല്‍ തന്നെ   ഉല്‍പാദന വര്‍ധനവിനുവേണ്ടി പണം ചെലവഴിക്കുന്നതിന് മുന്‍പ് മാര്‍ക്കറ്റിങ് സിസ്റ്റം മെച്ചപ്പെടുത്തണം. ഓണത്തിന് മുന്‍പ്  12500 മാര്‍ക്കറ്റ്  രൂപീകരിക്കും. ഇതിനു മുന്നോടിയായി എല്ലാ ജില്ലിയിലെയും മാര്‍ക്കറ്റിങ് രീതിയെക്കുറിച്ചുള്ള വിവരങ്ങള്‍ ശേഖരിക്കും.   

 2016-2017 വര്‍ഷം കൃഷി വകുപ്പ് നെല്‍ വര്‍ഷമായി ആചരിക്കും. വകുപ്പില്‍ നിരവധി പ്രശ്‌നങ്ങള്‍ ഉണ്ട്. ഉദ്യോഗസ്ഥരുടെ പ്രായോഗിക പ്രശ്‌നങ്ങള്‍ക്ക് ചര്‍ച്ചകളിലൂടെ തീരുമാനമെടുക്കുമെന്നും മന്ത്രി വ്യക്തമാക്കി. ഉദ്യോഗസ്ഥരുടെ സ്ഥലംമാറ്റവുമായി ബന്ധപ്പെട്ട വിഷയത്തില്‍ പുതിയ  മാനദണ്ഡങ്ങള്‍ നിശ്ചയിക്കും.
കൃഷി ഓഫിസര്‍മാര്‍ കര്‍ഷകരുമായി ബന്ധം സ്ഥാപിക്കാന്‍ തയാറാകണം. അവരുടെ പ്രശ്‌നങ്ങള്‍ കേള്‍ക്കാനുള്ള മനസ് കൃഷി ഓഫിസര്‍മാര്‍ക്കുണ്ടാവണമെന്നും മന്ത്രി വ്യക്തമാക്കി. നിലവില്‍ കേരളത്തില്‍ നെല്‍വയലുകള്‍ നിലനില്‍ക്കുന്നതില്‍ കൃഷി ഓഫിസര്‍മാരുടെ പങ്ക് വലുതാണ്. സര്‍ക്കാര്‍ നടപ്പാക്കുന്ന പദ്ധതികളില്‍ എളുപ്പവിദ്യ പാടില്ലെന്നും മന്ത്രി ഓഫിസര്‍മാരെ ഓര്‍മിപ്പിച്ചു.