കാബൂള്‍: അഫ്ഗാനിസ്ഥാന്‍ തലസ്ഥാനമായ കാബൂളില്‍ വിദേശ പൗരന്മാരുടെ താമസസ്ഥലം ലക്ഷ്യംവച്ച് നടത്തിയ സ്‌ഫോടനത്തില്‍ പൊലിസ് ഓഫിസറും മൂന്നു ഭീകരരും കൊല്ലപ്പെട്ടു. കാബൂളിലെ നോര്‍ത്ത് ഗേറ്റ് ഹോട്ടലിലാണ് ആക്രമണം. സ്‌ഫോടകവസ്തുക്കള്‍ നിറച്ച ട്രക്ക് പൊട്ടിത്തെറിച്ചാണ് വന്‍സ്‌ഫോടനമുണ്ടായത്.

ഹോട്ടല്‍ വളപ്പിലേക്ക് ട്രക്ക് പ്രവേശിക്കവെയാണ് സ്‌ഫോടനം നടന്നത്. തീവ്രവാദികളില്‍ ഒരാള്‍ സ്‌ഫോടനത്തിലും രണ്ടുപേര്‍ വെടിവയ്പ്പിലുമാണ് കൊല്ലപ്പെട്ടത്. കൊല്ലപ്പെട്ടവര്‍ താലിബാന്‍ തീവ്രവാദികളാണെന്ന് പൊലിസ് പറഞ്ഞു. ഭീകരരുടെ വെടിയേറ്റാണ് പൊലിസുകാരന്‍ കൊല്ലപ്പെട്ടത്.

ആക്രമണത്തിന്റെ ഉത്തരവാദിത്വം താലിബാന്‍ ഏറ്റെടുത്തിട്ടുണ്ട്. യു.എസ് വ്യോമതാവളമായി ഉപയോഗിക്കുന്ന വടക്കന്‍ കാബൂളിലെ ബഗ്രാം വിമാനത്താവളത്തിനു സമീപത്താണ് ആക്രമണമുണ്ടായ ഹോട്ടല്‍. കനത്ത സുരക്ഷാ സന്നാഹമുള്ള ഹോട്ടലാണിത്. കഴിഞ്ഞ 23 ന് കാബൂളില്‍ 80 പേരെ ഇരട്ടസ്‌ഫോടനത്തിലൂടെ താലിബാന്‍ കൊലപ്പെടുത്തിയിരുന്നു.  15 വര്‍ഷത്തിനിടെ താലിബാന്‍ കാബൂളില്‍ നടത്തിയ ഏറ്റവും വലിയ ആക്രമണമായിരുന്നു ഇത്.