ലണ്ടന്‍: ലോകത്തെ നടുക്കിയ ലണ്ടന്‍ ഭീകരാക്രമണത്തിനിടെ ജീവനും കൊണ്ടോടുന്ന ആളുകള്‍ക്കിടയില്‍ ബിയര്‍ ഗ്ലാസ് ബിയര്‍ ഗ്ലാസ് കൈവിടാതെ നടക്കുന്ന യുവാവിന്റെ ചിത്രം സമൂഹ മാധ്യമങ്ങളില്‍ വൈറലാകുന്നു.
ഒരു കവിള്‍ കുടിച്ച ശേഷം ആള്‍ക്കൂട്ടത്തിന്റെ ബഹളം കാര്യമാക്കാതെ നടന്നു വരുന്ന യുവാവിന്റെ ചിത്രം ട്വിറ്ററിലാണ് ആദ്യം പ്രത്യക്ഷപ്പെട്ടത്. ഇത് പിന്നീട് ആളുകള്‍ ഏറ്റെടുത്തു.
'ലണ്ടന്‍ ആവശ്യപ്പെടുന്ന നായകന്‍. തന്റെ പൈന്റിന്റെ ഒരു തുള്ളി നഷ്ടപ്പെടുത്താന്‍ അദ്ദേഹം തീവ്രവാദത്തെ അനുവദിച്ചില്ല.' ഇതാണ് ഒരു ട്വീറ്റ്.
ബ്രിട്ടീഷുകാരുടെ ആത്മധൈര്യത്തിന്റെ ചിഹ്നമായും ചിത്രം ചര്‍ച്ച ചെയ്യപ്പെട്ടു.

എന്നാല്‍ ഇയാളുടെ പ്രവര്‍ത്തിക്കെതിരായ വിമര്‍ശനങ്ങളും ചിലര്‍ ഉന്നയിക്കുന്നുണ്ട്.

ശനിയാഴ്ച രാത്രിയാണ് ലണ്ടന്‍ ബ്രിഡ്ജിലും ബോറോ മാര്‍ക്കറ്റിലും ആക്രമണം നടന്നത്. ലണ്ടന്‍ ബ്രിഡ്ജില്‍ കാല്‍നട യാത്രക്കാര്‍ക്കിടയിലേക്ക് തീവ്രവാദികള്‍ വാന്‍ ഓടിച്ചുകയറ്റുകയായിരുന്നു. 20 ഓളം പേരെ ഇടിച്ചുവീഴ്ത്തിയ ശേഷം വാന്‍ ഒരു ബസ് സ്റ്റോപ്പിലേക്ക് ഇടിച്ചുകയറ്റി നിര്‍ത്തി. പുറത്തിറങ്ങിയ തീവ്രവാദികള്‍ ആളുകളെ കുത്തിവീഴ്ത്തി.

ഇതേ സമയം തന്നെ ബോറോ മാര്‍ക്കറ്റില്‍ അക്രമികള്‍ ആളുകളെ കുത്തിവീഴ്ത്തുകയായിരുന്നു. കത്തിയുമായി അക്രമം നടത്തിയവര്‍ക്ക് നേരെ പൊലിസ് വെടിയുതിര്‍ത്തു. രണ്ട് ആക്രമണങ്ങളിലുമായി ഏഴ് പേര്‍ കൊല്ലപ്പെട്ടു.

മൂന്നു ഭീകരരും കൊല്ലപ്പെട്ടിരുന്നു.