ഉപ്പള: 16 കാരിയെ തട്ടിക്കൊണ്ടുപോകാന്‍ ശ്രമിച്ച കൊലക്കേസ് പ്രതിയെ പൊലിസ് അറസ്റ്റ് ചെയ്തു. കുക്കാര്‍ സ്‌കൂളിന് സമീപത്തെ 16 കാരിയെ തട്ടിക്കൊണ്ടു പോകാന്‍ ശ്രമിച്ച കൊലക്കേസ് പ്രതിയെ മണിക്കൂറുകള്‍ക്കകമാണ് പൊലിസ് അറസ്റ്റ് ചെയ്തത്. ബന്തിയോടിന് സമീപം അടുക്കയില്‍ താമസിക്കുന്ന സദ്ദു എന്ന അബ്ദുല്‍ അസീറി (21) നെയാണ് അറസ്റ്റ് ചെയ്തത്. പരപ്പയില്‍ വെച്ചാണ് ഇയാളെ പിടികൂടിയത്. ഞായറാഴ്ച്ച വൈകുന്നേരം ആറുമണിയോടെയാണ് സംഭവം.
രാത്രി ഏറെ വൈകുംവരെ നടത്തിയ തിരച്ചിലിനൊടുവിലാണ് പെണ്‍കുട്ടിയെ തട്ടിക്കൊണ്ടുപോയ പ്രതിയെയും പെണ്‍കുട്ടിയെയും കുമ്പള എസ്.ഐ മെല്‍വിന്‍ ജോസ് ഇരുവരേയും കണ്ടെത്തിയത്. വാഹനത്തില്‍ പെണ്‍കുട്ടിയെ കടത്തി കൊണ്ടുപോകുമ്പോഴാണ് പരപ്പയില്‍ വെച്ച് യുവാവിനെ പിടികൂടിയത്.
രണ്ടു വര്‍ഷം മുമ്പ് കുമ്പള പേരാലിലെ ഷഫീഖി (25)നെ കൊലപ്പെടുത്തിയ കേസില്‍ രണ്ടാം പ്രതിയാണ് അസീര്‍. ഷഫീഖിനെ കൊലപ്പെടുത്തിയ ശേഷം മണലില്‍ പൂഴ്ത്തിയ നിലയിലായിരുന്നു. ഈ കേസില്‍ അസീര്‍ ഉള്‍പ്പെടെ മൂന്നുപേരെ കുമ്പള പൊലിസ് അറസ്റ്റ് ചെയ്തിരുന്നു.
മൊഗ്രാല്‍നാങ്കി, കുമ്പള പേരാല്‍ എന്നിവിടങ്ങളിലും അസീര്‍ നേരത്തെ താമസിച്ചിരുന്നു. ഈ ഭാഗങ്ങളിലെ നിരവധി അക്രമകേസുകളില്‍ പ്രതിയാണ് അസീര്‍. ലൈസന്‍സില്ലാത്ത തോക്കുമായി ഏപ്രില്‍ ഒന്നിന് കര്‍ണാടക പൊലിസ് അസീറിനെ അറസ്റ്റ് ചെയ്തിരുന്നു. 12 ദിവസം മുമ്പാണ് ജാമ്യത്തിലിറങ്ങിയത്. കഴിഞ്ഞ ഒക്‌ടോബര്‍ ആറിന് പുത്തൂരിലെ രാജധാനി ജ്വല്ലറിക്ക് നേരെ വെടിയുതിര്‍ത്ത കേസിലും അബ്ദുല്‍ അസീര്‍ പ്രതിയാണ്.