സ്വന്തം ലേഖകന്‍
തിരുവനന്തപുരം: കണ്‍സ്യൂമര്‍ ഫെഡ് എം.ഡി സ്ഥാനത്തേക്ക് ഡോ.കെ.എ രതീഷിനെ പരിഗണിക്കാന്‍ യോഗ്യത മാത്രമേ നോക്കിയുള്ളൂവെന്ന് സഹകരണ വകുപ്പ് സെക്രട്ടറി മിനി ആന്റണി.
കേസുണ്ടോയെന്നത് അഭിമുഖ സമയത്ത് നോക്കിയില്ലെന്നും മന്ത്രി കടകംപള്ളി സുരേന്ദ്രന് നല്‍കിയ വിശദീകരണത്തില്‍ മിനി ആന്റണി പറഞ്ഞു.വിഷയത്തില്‍ മന്ത്രി കടകംപള്ളി സുരേന്ദ്രന്‍ മിനി ആന്റണിയോട് വിശദീകരണം തേടിയിരുന്നു. അതേസമയം, നിയമന നീക്കം പുറത്തറിഞ്ഞത് എങ്ങനെയെന്ന് അന്വേഷിക്കണമെന്ന് സി.പി.എം നേതൃത്വം സഹകരണ മന്ത്രിയോട് ആവശ്യപ്പെട്ടു.
അഴിമതിക്കേസില്‍ സി.ബി.ഐ അന്വേഷണം നേരിടുന്ന ഡോ.കെ.എ രതീഷിനെ കണ്‍സ്യൂമര്‍ ഫെഡിന്റെ എം.ഡിയായി നിയമിക്കാന്‍ വിജിലന്‍സിന്റെ അനുമതി തേടിയിരുന്നു.
രതീഷ് അഭിമുഖത്തില്‍ ഒന്നാംസ്ഥാനത്ത് എത്തുകയും ചെയ്തു. ഇത് വാര്‍ത്തയായതിനെ തുടര്‍ന്നാണ് മുഖംരക്ഷിക്കാന്‍ മന്ത്രി സെക്രട്ടറിയോട് വിശദീകരണം തേടിയതെന്നാണ് ആരോപണം.
സെക്രട്ടറിയാണ് അപേക്ഷ ക്ഷണിച്ചതും അന്തിമ പട്ടിക തയാറാക്കിയതെന്നുമാണ് അഭിമുഖ ബോര്‍ഡിലുണ്ടായിരുന്ന മറ്റുള്ളവരുടെ വിശദീകരണം.സംഭവം വിവാദമായ സാഹചര്യത്തില്‍ തല്‍ക്കാലം ഫയല്‍ വിജിലന്‍സ് ക്ലിയറന്‍സിനായി അയയ്‌ക്കേണ്ടെന്ന് സഹകരണ മന്ത്രി കടകം പള്ളി സുരേന്ദ്രന്‍ നിര്‍ദേശിച്ചിട്ടുണ്ട്.