സ്വന്തം ലേഖകന്‍

തൊടുപുഴ: മഴ കുറഞ്ഞതോടെ വൈദ്യുതി ഉപഭോഗം കൂടി. തകരാറുകള്‍ പരിഹരിച്ച് കൂടുതലിടത്ത് വൈദ്യുതി എത്തിക്കാനായതും ഉപഭോഗം ഉയരാന്‍ കാരണമായി. 62.3019 ദശലക്ഷം യൂനിറ്റ് വൈദ്യുതിയാണ് ഇന്നലെ രാവിലെ ഏഴിന് അവസാനിച്ച 24 മണിക്കൂറില്‍ സംസ്ഥാനത്ത് ഉപയോഗിച്ചത്.
വെള്ളിയാഴ്ച രാവിലെ ഇത് 57 ദശലക്ഷം യൂനിറ്റായിരുന്നു. പേമാരിയായിരുന്ന കഴിഞ്ഞയാഴ്ച ഉപഭോഗം 41 ദശലക്ഷം യൂനിറ്റ് വരെ താഴ്ന്നിരുന്നു. 15.1835 ദശലക്ഷം യൂനിറ്റാണ് ഇന്നലത്തെ ആഭ്യന്തര ഉല്‍പാദനം. മഴ കുറഞ്ഞതോടെ ജലനിരപ്പുയരുന്നതും സാവധാനമായി. ഇന്നലെ രാവിലെ രേഖപ്പെടുത്തിയ കണക്കുപ്രകാരം വൈദ്യുതി ബോര്‍ഡിന് കീഴിലുള്ള സംഭരണികളിലാകെ ജലശേഖരം 50.67 ശതമാനമാണ്. ഈ വെള്ളം ഉപയോഗിച്ച് 2098.121 ദശലക്ഷം യൂനിറ്റ് വൈദ്യുതി ഉല്‍പാദിപ്പിക്കാനാകും.ഇടുക്കി അണക്കെട്ടിലെ ജലനിരപ്പ് 2350.78 അടിയായി ഉയര്‍ന്നു. സംഭരണശേഷിയുടെ 46.52 ശതമാനമാണിത്. ഇന്നലെ രാവിലെ 9ന് രേഖപ്പെടുത്തിയ കണക്കുപ്രകാരമാണിത്.
പരമാവധി സംഭരണശേഷി 2403 അടിയാണ്. 24 മണിക്കൂറിനിടെ 2.16 സെ.മീ മഴ പദ്ധതി പ്രദേശത്ത് ലഭിച്ചപ്പോള്‍ 24.711 ദശലക്ഷം യൂനിറ്റ് വൈദ്യുതിക്കാവശ്യമായ വെള്ളം ഒഴുകിയെത്തി. 1.455 ദശലക്ഷം യൂനിറ്റായിരുന്നു മൂലമറ്റം പവര്‍ ഹൗസിലെ ഉല്‍പാദനം. അതേസമയം, മുല്ലപ്പെരിയാര്‍ ഡാമിലെ ജലനിരപ്പ് 131 അടിയിലെത്തി.
പമ്പ, കക്കി 47 ശതമാനം, ഇടമലയാര്‍ 53, ഷോളയാര്‍ 59, കുണ്ടള 46, മാട്ടുപ്പെട്ടി 34, കുറ്റ്യാടി 92, തരിയോട് 91, ആനയിറങ്കല്‍ 31, പൊന്മുടി 90, നേര്യമംഗലം 92, പെരിങ്ങല്‍കുത്ത് 63, ലോവര്‍ പെരിയാര്‍ 94 ശതമാനം എന്നിങ്ങനെയാണ് മറ്റ് അണക്കെട്ടുകളിലെ ജലനിരപ്പ്. കുറ്റ്യാടിയിലാണ് കൂടുതല്‍ മഴ ലഭിച്ചത് (2.9 സെ.മീ). കുറവ് കക്കിയിലാണ് (0.05 സെ.മീ)