ന്യൂഡല്‍ഹി: അയോധ്യയില്‍ മത സൗഹര്‍ദാ പരിപാടിയില്‍ സംബന്ധിക്കാനെത്തിയ സാമൂഹ്യപ്രവര്‍ത്തകരെ തടഞ്ഞ് ഉത്തര്‍പ്രദേശ് പൊലിസ്. മേഖലയില്‍ സമാധാനം ഇല്ലാതാക്കുമെന്ന വാദമുന്നയിച്ചാണ് പൊലിസ് നടപടി.

രാം പുനിയാനി അടക്കമുള്ള സാമൂഹ്യപ്രവര്‍ത്തകരെയാണ് തടഞ്ഞത്. സാമുദായിക സൗഹാര്‍ദത്തിനും സമാധാനത്തിനും വേണ്ടി എന്ന സന്ദേശമുയര്‍ത്തി സംഘടിപ്പിക്കുന്ന ശില്‍പ്പശാലയില്‍ സംബന്ധിക്കാനായിരുന്നു ഇവര്‍ എത്തിയത്.

മഹന്ത് യുഗല്‍ കിഷോര്‍ ശര്‍മ്മ മുഖ്യ പൂജാരിയായ അയോധ്യയിലെ സരയൂ കുഞ്ച് ക്ഷേത്രത്തിലായിരുന്നു രണ്ടു ദിവസത്തെ ശില്‍പ്പശാല സംഘടിപ്പിക്കുന്നതിന് തീരുമാനിച്ചിരുന്നത്.

കുദായി ഖിദ്മത്ത്ഗര്‍ എന്ന സംഘടനയും മഗ്‌സാസെ അവാര്‍ഡ് ജേതാവ് സന്ദീപ് പാണ്ഡെ, മഹന്ത് ശാസ്ത്രി തുടങ്ങിയ പ്രമുഖരും ചേര്‍ന്നാണ് ശില്‍പ്പശാല സംഘടിപ്പിച്ചത്. എഴുത്തുകാരനും സാമൂഹ്യപ്രവര്‍ത്തകനുമായ രാംപുനിയാനിയായിരുന്നു ഇന്ന് ആരംഭിക്കുന്ന ശില്‍പ്പശാലയില്‍ മുഖ്യപ്രഭാഷണം നടത്തുന്നതിന് തീരുമാനിച്ചിരുന്നത്.

സംസ്ഥാനത്തിന്റെ വിവിധ പ്രദേശങ്ങളില്‍ നിന്ന് ശില്‍പ്പശാലയില്‍ പങ്കെടുക്കാന്‍ ആളുകള്‍ എത്തിക്കൊണ്ടിരിക്കുകയായിരുന്നു. പുലര്‍ച്ചെ നാലുമണിയോടെ സന്ദീപ് പാണ്ഡെയുടെ വസതിയില്‍ എത്തിയ ഉത്തര്‍പ്രദേശ് പൊലിസ് പാണ്ഡെ, പുനിയായി എന്നിവരോടും ഒപ്പമുണ്ടായിരുന്ന വളണ്ടിയര്‍മാരോടും അയോധ്യയിലേയ്ക്ക് പോകരുതെന്നും പരിപാടിക്കുള്ള അനുമതി റദ്ദാക്കിയതായും അറിയിക്കുകയായിരുന്നു.

സമാധാനത്തിനും സൗഹാര്‍ദ്ദത്തിനും വേണ്ടിയാണ് ശില്‍പ്പശാല സംഘടിപ്പിക്കുന്നതെന്ന് അറിയിച്ച പാണ്ഡെയും പുനിയാനിയും അയോധ്യയിലേക്ക് പുറപ്പെട്ടുവെങ്കിലും രണ്ടുവാഹനങ്ങളിലായി പൊലിസ് സംഘം പിന്തുടരുകയും അയോധ്യക്ക് പത്തു കിലോമീറ്റര്‍ അകലെയുള്ള ടോള്‍ബൂത്തില്‍ വച്ച് തടയുകയും കസ്റ്റഡിയിലെടുക്കുകയുമായിരുന്നു.