വെസ്റ്റ് ബാങ്ക്: അധിനിവിഷ്ട വെസ്റ്റ് ബാങ്കിന് സമീപമുള്ള ഫലസ്തീന്‍ ഗ്രാമമായ ഖാന്‍ അല്‍ അഹ്മര്‍ തകര്‍ക്കാനൊരുങ്ങി ഇസ്‌റാഈല്‍ സൈന്യം. കെട്ടിടങ്ങള്‍ തകര്‍ക്കാനായി ബുള്‍ഡോസറുകള്‍, ഉപകരണങ്ങള്‍ എന്നിവയുമായി സൈന്യം ഇവിടെ പ്രവേശിച്ചുവെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. ആക്ടിവിസ്റ്റുകളുടെ നേതൃത്വത്തില്‍ സൈന്യത്തിനെതിരേ പ്രതിഷേധിച്ചെങ്കിലും മൂന്ന് ബുള്‍ഡോസറുകള്‍ ഇന്നലെയും പ്രദേശത്ത് എത്തി.
തിങ്കളാഴ്ച, ഖാന്‍ അല്‍ അഹ്മറിലെ കെട്ടിടങ്ങള്‍ തകര്‍ക്കുന്നതിനെ ചെറുത്തതിനെ തുടര്‍ന്ന് ഏഴ് പേര്‍ക്ക് പരുക്കേല്‍ക്കുകയും നാല് പേരെ തടവിലിടുകയും ചെയ്തിരുന്നു. പ്രതിഷേധവുമായി 200 പേരാണ് എത്തിയത്.
ഖാന്‍ അല്‍ അഹ്മറിലുള്ള 200 ഫലസ്തീനികളെ ഒഴിപ്പിച്ച് 12 കി.മീ അകലെയുള്ള അബൂ ദിസിലേക്കോ ചാവ് കടലിന് സമീപത്തേക്കോ മാറ്റാനാണ് ഇസ്‌റാഈല്‍ നീക്കം. എന്നാല്‍ വീടുകളില്‍ നിന്ന് ജനങ്ങളെ നിര്‍ബന്ധിച്ച് മാറ്റിത്താമസിപ്പിക്കുന്നത് അന്താരാഷ്ട്ര നിയമങ്ങള്‍ക്ക് വിരുദ്ധവും യുദ്ധക്കുറ്റവുമാണെന്ന് യു.എന്‍ ഉള്‍പ്പെടെയുള്ള നിരവധി സംഘടനകള്‍ ആരോപിച്ചിരുന്നു. ഗ്രാമം തകര്‍ക്കാനുള്ള നീക്കത്തിനെതിരേ പ്രദേശവാസികളുടെ നേതൃത്വത്തില്‍ തുടങ്ങിയ പ്രതിഷേധ സമരം 100 ദിവസം പിന്നിട്ടു.
ഖാന്‍ അല്‍ അഹ്മര്‍ ഒക്ടോബര്‍ ഒന്നോടെ വിട്ടുപോവണമെന്ന് ഇസ്‌റാഈല്‍ സൈന്യം പ്രദേശത്തുകാര്‍ക്ക് അന്ത്യശാസനം നല്‍കിയിരുന്നു.