അഡ്‌ലെയ്ഡ്: ആസ്‌ത്രേലിയയില്‍ നടന്ന വനിതാ ക്രിക്കറ്റ് മത്സരത്തില്‍ ഒരു ടീം ജയിച്ചത് 571 റണ്‍സിന്. ഒരു ടീമിലെ നാല് താരങ്ങള്‍ സെഞ്ചുറിയും നേടി മത്സരം ഗംഭീരമാക്കി.
അമ്പരന്നു പോകും ഈ ജയം കേട്ടാല്‍. സംസ്ഥാനതല സൂപ്പര്‍വുമണ്‍ ഗ്രേഡ് മത്സരത്തില്‍ നോര്‍ത്തേണ്‍ ഡിസ്ട്രിക്ട്‌സ് പോര്‍ട്ട് അഡ്‌ലെയ്ഡിനെ തോല്‍പ്പിച്ചത് 571 റണ്‍സിനായിരുന്നു. നിശ്ചിത 50 ഓവറില്‍ നോര്‍ത്തേണ്‍ ഡിസ്ട്രിക്ട്‌സ് മൂന്നു വിക്കറ്റ് നഷ്ടത്തില്‍ 596 റണ്‍സെടുത്തപ്പോള്‍ എതിരാളികള്‍ക്ക് കേവലം 25 റണ്‍സിന് കൂടാരം കയറേണ്ടി വന്നു.
നോര്‍ത്തേണ്‍ ഡിസ്ട്രിക്ട്‌സിനുവേണ്ടണ്ടി തെഗാന്‍ മക്ഫര്‍ലിന്‍ 80 പന്തില്‍ 136 റണ്‍സും, തമിബ സാവില്ലെ 56 പന്തില്‍ 120 റണ്‍സും, സാം ബെറ്റ്‌സ് പുറത്താകാതെ 71 പന്തില്‍ 124 റണ്‍സും, ഡാര്‍സി പുറത്താകാതെ 84 പന്തില്‍ 117 റണ്‍സുമെടുത്തു. ടീം 64 ഫോറുകള്‍ നേടിയപ്പോള്‍ വെറും മൂന്ന് സിക്‌സറുകള്‍ മാത്രമേ പിറന്നുള്ളു. 88 റണ്‍സ് എക്ട്രാ വഴിയും ടീമിന് ലഭിച്ചു. ഇതില്‍ 75 വൈഡുകളും ഉള്‍പ്പെടുന്നു.
മറുപടി ബാറ്റിങ്ങിനിറങ്ങിയ പോര്‍ട്ട് അഡ്‌ലെയ്ഡ് ടീമിന് 10.5 ഓവറിനപ്പുറം ബാറ്റ് ചെയ്യാനായില്ല.