റിയോ ഡി ജനീറോ: മുന്‍ ബ്രസീല്‍ താരവും ഐ.എസ്.എല്ലില്‍ ചെന്നൈയിന്‍ എഫ്.സിയുടെ നായകനുമായിരുന്ന എലാനോ ബ്ലൂമര്‍ ബ്രസീല്‍ ഫുട്‌ബോളിലെ അതികായരായ എഫ്.സി സാന്റോസിന്റെ താത്കാലിക പരിശീലകന്‍. രണ്ടാം തവണയും പരിശീലകനായി ചുമതലയേറ്റ ഡൊറിവല്‍ ജൂനിയറിന് പകരമാണ് സാന്റോസ് ക്ലബ് ബ്ലൂമര്‍ക്ക് താത്കാലിക ചുമതല നല്‍കിയത്.
2015ലാണ് ഡൊറിവല്‍ ടീമിന്റെ കോച്ചായി രണ്ടാം വട്ടവും തിരഞ്ഞെടുക്കപ്പെട്ടത്. ടീമിനെ 111 വിജയങ്ങളിലേക്ക് നയിച്ച പരിശീലകനാണ് ഡൊറിവല്‍. 44 തോല്‍വികളും 34 സമനിലകളും ടീം നേരിട്ടു. നിലവില്‍ പോയിന്റ് പട്ടികയില്‍ 16ാം സ്ഥാനത്താണ് സാന്റോസ്. കഴിഞ്ഞ ദിവസം കൊറിന്ത്യന്‍സുമായുള്ള മത്സരത്തില്‍ പരാജയപ്പെട്ടതിന് പിന്നാലെ പരിശീലക സ്ഥാനം ഒഴിയുന്നതായി അദ്ദേഹം വ്യക്തമാക്കുകയായിരുന്നു.
സാന്റോസിന്റെ മുന്‍ താരം കൂടിയായ എലാനോ ക്ലബിന്റെ ടെക്‌നിക്കല്‍ അസിസ്റ്റന്റായി പ്രവര്‍ത്തിച്ചു വരികയായിരുന്നു. 2014, 2015 സീസണുകളില്‍ ചെന്നൈയിന്‍ എഫ്.സിയുടെ താരമായിരുന്നു എലാനോ.