കുറ്റ്യാടി: തെളിവെടുപ്പിനായി കൊണ്ടുവന്ന പോക്‌സോ പ്രതിയെ രക്ഷപ്പെടാന്‍ സഹായിച്ച കേസില്‍ മാതാപിതാക്കള്‍ ഉള്‍പ്പെടെ അഞ്ചുപേരെ റിമാന്‍ഡ് ചെയ്തു.
പോക്‌സോ പ്രതിയായ മരുതോങ്കര സെമിത്തേരിമുക്കില്‍ പയ്യന്റെവിടതാഴേക്കുനി ശ്രീഷി (19)നെ രക്ഷപ്പെടാന്‍ സഹായിച്ച പിതാവ് ശ്രീനിവാസ്, മാതാവ് നിശിത, പ്രതിയുടെ സുഹൃത്തുക്കളായ അഖില്‍, അമല്‍ബിജു, ജോമറ്റ് എന്നിവരെയാണു തൊട്ടില്‍പ്പാലം പൊലിസ് ഇന്നലെ രാവിലെ അറസ്റ്റ് ചെയ്തത്. പൊലിസ് കോടതിയില്‍ ഹാജരാക്കിയ ഇവരെ പിന്നീട് റിമാന്‍ഡ് ചെയ്തു.
കോടതിയില്‍നിന്ന് കസ്റ്റഡിയില്‍ വാങ്ങിയ ശ്രീഷിനെ തൊട്ടില്‍പ്പാലം എസ്.ഐ ബിജുവിന്റെ നേതൃത്വത്തിലുള്ള സംഘം തിങ്കളാഴ്ച്ച വൈകിട്ടാണ് മരുതോങ്കരയിലെ വീട്ടിലെത്തിച്ച് തെളിവെടുപ്പ് നടത്തിയത്. എന്നാല്‍ തെളിവെടുപ്പ് നടന്നുകൊണ്ടിരിക്കുന്നതിനിടെ പ്രതി മാതാപിതാക്കളുടെയും സുഹൃത്തുക്കളുടെ സഹായത്തോടെ പൊലിസിനെ വെട്ടിച്ച് കടന്നുകളയുകയായിരുന്നു. ഈമാസം എട്ടിനാണ് കേസിനാസ്പദമായ സംഭവം നടന്നത്.